22. 7. 2025: Вмер Миломір Шайтош, хореоґраф, културно-общественный дїятель із Нового Саду

Як інформовала аґентура Рутенпрес, в недїлю, 20-го юла 2025-го року, вмер Миломір Шайтош, довгорочный русиньскый дїятель і актівіста, хореоґраф Русиньского културного центра в Новім Садї. По куртій і тяжкій хворотї вмер у віцї 65 років.

Миломір Шайтош быв почас своёй професіоналной карьєры робив у різных фукціях. Актівный быв і в рамках штруктур Світового конґресу Русинів. Быв основателём Русин філм фесту, котрый орґанізовав ся в Шідї.

Народив ся Миломір Шайтош 6-го юна 1960-го року в Новім Садї, втогды у Югославії. Мав музичну освіту, быв абсолвентом новосадьской Академії умень. В роках 1977 аж 1986 із перервами робив у Радію Новый Сад, наперед іщі як штудент середнё школы, пізнїше як сполупрацовник і редактор. Робив на музичных проґрамах.

Окрем музичной освіты, вышколовав ся за проґраматора, пізнїше в тім фаху і робив аж до одходу на пензію.

Од дїтинства быв членом Културно-умелецького дружства Максим Ґорькый, де перешов вшыткы етапы фолклорного танечника. Абословав 8 семестрів штудій про кадры в области танечно-фолклорной творчости із окремым акцентом на навчаня історії танцїв, народной одежды і сценічной обробкы танцїв.

Од 2003-го року быв хореоґрафом Русиньского културного центра в Новім Садї, як хореоґраф дві сезоны дїяв і в Шідї. Поставив коло 15 авторьскых хореоґрафій. Написав дакілько статей із области русиньского фолклору і фолклорістікы.

Миломір Шайтош быв довгы рокы і делеґатом засїдань Світового конґресу Русинів (СКР) за Сербію, конкретно за членьску орґанізацію Руска матка. Быв членом, пізнїше председом Конґресовой комісії про културу СКР, сполупрацовав із хореоґрафами вызначных русиньскых фолклорных ансамблїв, наприклад на Словакії. В рамках орґанізації Руска матка быв у функціях заступника председы, а так само і председы Новосадьской містьской орґанізації Руской маткы.

Довгы рокы Шайтош сполупрацовав із фолклорістом, етнолоґом і етномузиколом Іваном Чіжмарём із Свідника в рамках творїня проєкту зборника русиньской народной одежды із цїлого ареалу, в котрім жыють Русины.

Влада Автономной покраїны Войводина го в роцї 2017 на єден функчный період выменовала на функцію председы Справной рады Інштітуту про културу войводиньскых Русинів. Почас свого функчного періоду намагав ся здобыти про Інштітут новы просторы в Новім Садї, што ся і подарило.

Быв членом Совіту про народностны меншыны і членом Совіту про молодых Міста Новый Сад. Так само быв дакілько функчных періодів членом Націоналного совіту Русинів, самосправного орґану русиньской народностной меншыны в Сербії.

Як председа Справной рады Дружства Русинів Нового Саду – Войводины, брав участь на основаню Фестівалу малых сценічных форм у Новім Садї, фестівалу орхестрів під назвов Мелодії русиньского двора і фестівалу Русин філм фест в Шідї.

Вічная память!

Петро МЕДВІДЬ, ЛЕМ.фм, языкова і ґрафічна управа: АРК СР.