22. 8. 2025: Індіферентне тихо

Тото тихо розбивать вшыткы ілузії.

Іщі вечур перед тым єм бісїдовав із приятелём, же Підкарпатя є безпечне, а окрем єдной заблудженой ракеты там нич не впало за цїлу войну. 21-го авґуста, коли собі Чеська і Словацька републіка припоминають інвазію войск Варшавского договору і наслїдну окупацію Совітами, яка тырвала понад 20 років, ся сітуація дакус змінила.

Російскый аґресор атаковав Мукачово, кедь ракетами засягнув америцьку інівестіцію – фабрику. Подля послїднїх інформацій є 19 зраненых. Є вопросом, ці такы атакы стануть теперь реґуларным режімом на Підкарпатю, або знова ішло о выняток, і тота область зістане і далше найбезпечнїшов в рамках Україны.

Но уж теперь є ясне, же кедь даяка стриманость односно Підкарпатя з боку Москвы єствовала, якбач уж не єствує. Парадоксно по самітах америцького презідента із шефом Кремля, а пак із презідентом Україны і европскыма лідерами, де ся мало рїшыти, як закінчіти войну.

Атака на Мукачово є з русиньского боку дакус інша. Нїт, не підцїнюєме страсти людей в іншый областях Україны, в котрых мають атакы уж штоденный режім, но атака по нашій землї предсі лем дакус веце рушать із сердцём. Што є про мене дакус немилым несподїванём, она не рушать із сердцём політіків держав, котры мають із тым реґіоном історічны звязы.

На Підкарпатю жыє велика мадярьска меншына, і в Мукачові творять Мадяры шумне проценто жытелїв, а влада Віктора Орбана блокує приступовы переговоры Україны з Европсков уніёв і вдяка непорїшеным вопросам односно народностных прав. Лемже кедь Москва вдарить по тім реґіонї ракетами, якось тверды слова із мадярьской століцї не чути.

Віктор Орбан ку атацї не высловив ся нияк. Петер Сійярто, міністер загранічных дїл, лем знова повторив, же треба чімскоріше закінчіти войну, а атака в Мукачові є того далшым доказом.

Сочувствіє выразив зраненым мадярьскый презідент Тамаш Шуёк. А пак змінив статус. Кедь в першій верзії писав о російскій ракетовій атацї, в позміненім статусї уж придавник „російскый“ выхабив.

Братя Чехы радо носталґічно споминають на републіку Масарика, котрой частьов была і теріторія Русинів, але днесь собі на то не спомянув нихто.

Окрем того, же має Мадярьско свою народностну меншыну на Підкарпатю, має з тым реґіоном і довгу – тісячлїтню історію. Але в реакціях політіків то не відїти.

Братя Чехы радо носталґічно споминають на републіку Масарика, котрой частёв была і теріторія Русинів, але днесь собі на то не спомянув нихто із верьховных представителів. Ани презідент, ани председа влады, ани председа Сенату, ани предсидателька Посланецькой сеймовнї – нихто з них не написав ани чарку о атацї на місто, котре з Прагов має історічне – державне капчаня. А то треба припомянути, же і Чехы мають на Підкарпатю свою меншыну. Невелику, але мають.

Но і од словацькых владных представителїв бы єм, самособов, ани нич не чекав. Тоты єдины ня не скламали! Досправды не написали нич.

Од презідента через председу парламенту аж по председу влады – абсолутно нич. І то Роберт Фіцо хосновав Підкарпатя як місце стрїчі, кедь хотїв їднати з представителями Україны. Притім і Словаци там мають меншыну.

Інтересным є і то, же тихо суть жупаны Пряшівского і Кошыцького самосправного краю. Обидва реґіоны суть партнерьскыма реґіонами із Закарпатьсков областьов Україны. Файны партнеры.

Озвали ся ку темі пріматор Пряшова Франтішек Ольга, і віцепріматор Петро Крайяк. Пряшів є так само партнерьскым містом із Мукачовом.

Тото індіферентне тихо з боку мадярьскых, чеськых, словацькых політіків є досправды дачім, чому не порозумію. І кедь політіци на Словакії і в Чеській републіцї мають днесь „купу роботы“ з припоминанём інвазії, на Мукачово собі спомянути могли.

На другім боцї є добрї знати, яка є реална сітуація, і з чім, наприклад і мы Русины, кебы пришла рїшуча хвіля, можеме раховати. Тото тихо розбивать вшыткы ілузії.

Петро МЕДВІДЬ, ЛЕМ.фм. Статя была написана як коментарь „Вступне до контроли“ лемківского радія lem.fm. Выміна фотоґрафії, языкова і ґрафічна управа: АРК СР