23. 1. 2025: 440 тісяч людей навщівило в минулім роцї музеї і ґалерії Пряшівского самосправного краю

Рекордером є Любовняньскый музей.

За културов до музеїв і ґалерій Пряшівского самосправного краю (ПСК) пришло у 2024-ім роцї 440 тісяч людей, з того 400 тісяч завітало лем до музеїв. Інформовало о тім Оддїлїня комунікації ПСК.

Найвеце навщівників, аж 205 тісяч, евідовали знова в Любовняньскім музею – на градї в Старій Любовнї.

Припоминаме, же і в минувшім роцї быв запертый Музей модерного уменя Енді Варгола в Меджілабірцях, в котрого будові проходить велика реконштрукція.

Людей тягло і до Гуменного ці Бардеёва

Як інформовало Оддїлїня комунікації ПСК, до Старой Любовнї людей притягла і выняткова выстава комплетного портфолія Кралёвной Нытомбі, котра выникла як спікупраца меджі Любовняньскым музеём і Музеём модерного уменя Енді Варгола.

Творы Енді Варгола в минувшім році мож было відїти і за граніцями Словакії, наприклад на выставі в Нїмецьку ці Польщі, де собі їх посмотрило понад 9 тісяч людей.

Звекшуючім ся чіслом навщівників може похвалити ся Шарішскый музей в Бардеёві. У 2024-ім роцї навщівило ёго ескпозіції в Бардеёві і Бардеёвскых Купелях, де є сканзен народной архітектуры, понад 43 тісяч людей. І до Вігорлатьского музея в Гуменнім пришло веце людей. Ёго експозіції в ренесанчнім каштелю і сканзенї відїло понад 33 тісяч людей.

У 2025-ім роцї продовжує ся в рекошнтрукції Музея модерного уменя Енді Варгола в Меджілабірцях. Як інформовав край, у новых просторах бы мав музей привітати першых навщівників в осени того року.

Довтогды буде мож творы Варгола відїти на выставах у Франції, Чеській републіцї і в Польщі.

В рамках културных інштітуцій, котры належать під Пряшівскый самосправный край і суть в русиньскых реґіонах, Вігорлатьскый музей в Гуменнім тот рік приготовлює приповідковы експозіції, вечерны концерты на дворї каштеля ці театер в сканзенї.

Шарішскый музей в Бардеёві, конкретно сказен в Бардеёвскых Купелях, тот рік припомяне собі 60 років од свого отворїня. Єдным із подарунків про навщівників буде і проходяча реконштрукція ёго обєктів.

Любовняньскый музей в Старій Любовнї рихтує нову експозіцію, котра буде присвячена скарбам прінцезен де Бурбон. Сприступнена бы мала быти в місяцї юл як припомянутя 40-ой рочніцї смерти іспаньской прінцезны Ісабелы де Бурбон Замойской, послїднёго властника граду Любовня.

Так само 40 років свого єствованя одсвяткує сканзен під градом Любовня, і то в місяцї май того року.

Петро МЕДВІДЬ, ЛЕМ.фм, языкова і ґрафічна управа: АРК в СР.