23. 10. 2017: На Червеній ружі передали i літературну премію
21-го новембра 2017-го рока в Ужгородї проходив 18-ый річник Фестівалу русиньской културы Червена ружа. В рамках фестівалу была передана і Літературна премія Александра Павловіча за 2017-ый рік.
Фестівал тот рік проходив в просторах Закарпатьского академічного областного театру быбок „Бавка“ в Ужгородї. Попереднї рокы фестівал орґанізовав ся в Мукачові. Святочно го одкрыв Євгей Жупан, голова Народной рады Русинів Закарпатя, яка зъєдинять русиньскы орґанізації діючі на Підкарпатю, і котра є орґанізатором події. Жупан у приговорї підкреслив, же Русины суть мірный і законопошлушный народ, котрый лем хоче мати права, жебы розвивати свою културу і свій язык. Так само выразив радость, же напрік многому, што ся робило проти того, жебы фестівал орґанізовав ся, і все ся глядали причіны, чого го не робити, в суботу ся люди могли стрїтити вже на ёго 18-ім річнику.
По святочнім одкрытю 18-го річника фестівалу Червена ружа вже сцена належала умелцям. Модераторьскым словом фестівал проводили Ольга Прокоп і Ліліа Немеш, котры співають в дуо Червена ружа і проґрам обогатили і своїма співанками.
В рамках фестівалого проґраму выступило дакілько ансамблїв і солісітів, міджі котрыма мож спомянути такы мена як дітячій ансамбель Бабчіна співаночка, Сестры Перечинщіны, женьскый ансамбель Чинадієвка, Клара Лабик, Мірослава Копинець, Олена Полак ці Петро Матій. На фестівалї зазвучала і сучасна русиньска поезія, котру прочітали їй авторы, міджі іншыма Осиф Лемко, лавреат Літературной премії Александра Павловіча за 2014-ый рік ці Іван Ситар, автор тлумачінь поезії Єсенїна на русиньскый язык, але і далшых книжок авторьской поезії і тлумачінь.
І тот рік почас фестівалу передавала ся Літературна премія Александра Павловіча, котру выголошує Народна рада Русинів Закарпатя. За 2017-ый рік премію здобыв Юрій Чорі. Автор 64-ох книжок, окрем іншого, і пятьтомного выданя „Словарь русинського языка“, здобыв премію за ёго так само пятьтомный словник русиньскых фразеолоґізмів.
П. М.
