23. 10. 2018: Оцїнили Осифа Бобалика

Як інорфмовала словацька пресова аґентура „SITA‟, штирёх лавреатів буде мати в тім роцї Премію Пряшівского самосправного краю. Двоми з них будуть нагороджены in memoriam.

Іn memoriam будуть краём нагороджены двоми гасічі – Радослав Лацко і Петер Тодёр. Пряшівскый самосправный край далше нагородить своёв преміёв Петра Липу – словацького джезового музиканта, котрый народив ся у Пряшові і політічного арештанта, русиньского оптанта Осифа Бобалика. Комісія выберала із помеджі 31 пропозіцій, о менах вырїшыло ся в понеділёк, 22-го октобра 2018-го року.

 

Осиф Бобалик

Днесь 90-річный Осиф Бобалик народив ся у русиньскім селї Луків, Бардеёвского окресу. Ёго родина была єднов із 59-ох родин того села, котры під впливом лжывой пропаґанды і великой аґітації выселила ся до Совєтьского союзу в рамках такзваных „оптацій“, де їх аґітаторы вербовали на уроджайну землю і богатство. Рїшіня русиньскых оптатів одыйти было свободне, но зроблене на основі лжи.

Бобалика почась єдной танечной забавы в совєтьскій Українї озброєный банедровець примусив прочітати протисталіньску аґітку, о пару місяцїв го затримали і быв одсуженый на десять років арешту в робочіх лаґрах. В тяжкых кліматічных, природных і людьскых условіях робив аж до року 1955. У 1967-ім роцї ся з родинов вернув до Чехословакії.

В роцї 2010 мав о Осифови Бобаликови премєру філм під назвов Осиф і ёго братя (Jozef a jeho bratia), котрый зробило Здружіня інтеліґенції Русинів Словеньска в сполупраці з Інштітутом памяти народа. Так само выникла о Осифови Бобаликови і книга мемоарів під назвов Сім років на северї (Sedem rokov na severe).

Оцїнїня про Осифа Бобалика запропоновала Анна Главачова, котра была режісерков споминаного філму. Комісія му єй признала за незломну волю і одвагу при просаджованю моралных вартостей і свободы прояву.

Святочне передаваня оцїнїнь одбуде ся 18-го децембра 2018 в Театрї Йонаша Заборьского в Пряшові.

 

Іншы оцїнены Русины

Оцїнїня Пряшівского самосправного краю і председы Пряшівского самосправного краю ся удїлюють од року 2004. За тот час было уж оцїненых і дакілько Русинів. Меджі нима были Русины: Ёго блаженость Николай, православный архієпіскоп, співачкы Марія Мачошкова, Анна Сервіцька, Моніка Канрачова, малярї Юрій Кресила, Андрій Смолак і доктор-ортопед Ян Клёц.

Петро МЕДВІДЬ, лем.фм