23. 4. 2018: День Русина на Підкарпатю святковали уж через вікенд

24-ый апріль – то датум народжіня Александра Духновіча, а єдночасно і датум, котрый выбрали собі в рамках Світового конґресу Русинів Русины на Українї як День Русина. Тогорічны святкованя проходили у Виноградові і Мукачові уж через вікенд.

Тот рік святкованя є дакус округлый, бо припоминаме собі 215 років од народжіня найвекшого із русиньскых будителїв.

В пятніцю 20-го апріля в пополїдняйшых годинах у Виноградові в просторах Містьского дому културы проходила подія під назвов День русиньской културы. Як інформовав портал Голос Карпат Юрій Продан, голова Закарпатьского областного науково-културолоґічного общества Александра Духновіча, фестівал проходив уже шестый раз. На фестівалї выступали колектівы із Виноградівщіны, Іршавщіны, Мукачівщіны і Ужгорода. В рамках події одбыла ся і презентація новой книжкы русиньского пистеля Михайла Чухрана під назвов Фейсбук-фіґлі. Общество Духновіча не забыло ани на будителя. Юрій Продан вєдно із Іваном Бушком під Памятник Духновіча у Виноградові за участи русиньской громады поклали квітя.

В Мукачові в суботу 21-го апріля проходив головный проґрам святкованя, котрый орґанізовав член Світового конґресу Русинів за Україну – Краёве общество підкарпатьскых Русинів на челї з Миколом Бобинцём.

День Русина одбыв ся у Мукачівскім драматічнім театрї. Подія традічно зачала, як інформовав Юрій Шиповіч, походом ку памятнику Духновіча, котрый стоїть в центрї міста. І в Мукачові поклали квітя ку памятнику будителя і продовжовали святочным концертом, на котрім выступали домашнї солісты і ансамблї як Мірослава Копинець, Серґій Савчук, Фатёве ці Бабчіна співаночка. Публіцї одпрезентовали ся і два ансамблї зо Словакії.

В рамках проґраму быв выголошеный і лавреат Літературной премії Івана Петровція, котрым тот рік став Володимір Рошко, русиньскый поет, науковець і педаґоґ.

П. М., жрідло фотоґрафії: Юрій Шиповіч

 

Script logo