23. 4. 2025: Словацька влада схвалила представителя Ґуралів у народностній радї
В Палатї народностных меншын, котра є частёв Рады влады Словацькой републікы про народностны меншыны, буде мати єдного представителя і ґуральска народностна меншына.
Выходить то із зміны і доповнїня штатуту Рады, котры в середу, 23-го апріля 2025-го року, схвалила словацька влада. Інформовала о тім аґентура TASR.
„Цїлём є промітнути вызнаня ґуральской комуніты жыючой в Словацькій републіцї за народностну меншыну зачленїнём їй представителя до Рады влады СР про народностны меншыны,“ арґументовав доповніня штатуту председа влады Словацькой републікы Роберт Фіцо, котрый передкладав пропозіцію. Премєр є подля штатуту і председом народностной рады.
В штатутї той рады так само управили ся пункты повязаны із представлїнём народностных меншын в Радї. „Заміром є прецізовати дакотры установлїня в інтересї звекшіня їх єднозначности і ефектівности реалізації,“ арґументує передкладатель.
Припоминаме, же Рада влады Словацькой републікы про народностны меншыны як окремый порадный орґан владного кабінету выникнув дефінітівно схвалїнём їй штатуту на кінцю октобра 2024-го року. Попередником того орґану быв Выбор про народностны меншыны і етнічны ґрупы, котрый належав під Раду влады Словацькой републікы про людьскы права, народностны меншыны і родову рівность.
Рада надвязує на роботу Выбору, повнить функцію конзултатівного орґану при коордінації публічных політік і забезпечованю участи членів народностных меншын на вырїшованю дїл, котры ся народностных меншын дотуляють. Так само є постоянным фаховым орґаном про область імплементації Европской харты реґіоналных або меншыновых языків.
Перше засїданя Рады влады Словацькой републікы про народностны меншыны одбыло ся на кінцю януара того року. Участны втогды были коопотваны представителї меншын із попереднёго меншынового выбору.
У фебруарї того року проходили вольбы, в котрых собі окремы народностны меншыны посередництвом своїх орґанізацій, якы зареґістровали ся на вольбы, выбрали на штирирочный функчный період своїх новых представителїв.
Мадяры мають в даній радї сім членів. Ромове мають штирёх, Русины трёх, Українцї і Чехы по двоє членів, решта надодностных меншын має по єднім представителёви.
„Днесь завершыв ся процес узнаня Ґуралів за народностну меншыну,“ інформовав на офіціалнім сайтї на сітї Facebook уповномоченый влады СР про народностны меншыны Акош Горонь.
„В януарї Ґуралї стали 15-ов народностнов меншынов на Словакії, але на просаджіня конштітуціёв ґарантованых прав потребны суть далшы крокы. Влада днешнїм рїшінём змінила штатут Рады влады про народностны меншыны і встановила представителя про нашу найновшу народностну меншыну,“ продовжує Горонь з тым, же в куртім часї выголосить доповнюючі вольбы про представителя за ґуральску меншыну до Рады влады СР про народностны меншыны.
Петро МЕДВІДЬ, ЛЕМ.фм, языкова і ґрафічна управа: АРК СР.
