23. 5. 2025: Ґрекокатолицькы єпіскопы з Мадярьска і Словакії вєдно засїдали в Маріяповчі
Єпіскопи собі припомянули юбілей зряджіня митрополії.
Як інформовав Пресовый центер Кошыцькой єпархії, ґрекокатолицькы єрархы із Мадярьска 19-го марца 2025-го року стрїтили ся в Маріяповчі, жебы вєдно з єпіскопами із Словакії засїдали на Радї єрархів, і одсвятковали тым 10-ту рочніцю зряджіня митрополії.
Вечур заповнили базиліку в Маріяповчі віруючі і священици на Літурґії оперед посвяченых дарів, на котрій брали участь і єпіскопи.
Десять років митрополії
Перед десятёма роками, 19-го марца 2015-го року, Папа римскый Франціск основав Ґрекокатолицьку митрополію в Мадярьску. Головны святкованя мають одбыти ся в авґустї почас великого одпусту в Маріяповчі. Маріяповч є єдным із найвызначнїшых історічных одпустовых місць ґрекокатоликів русиньской традіції.
З нагоды рочніцї в день зряджіня митрополії стрїтили ся єрархы на міморяднім засїданю Рады єрархів – верьховного орґану митрополітной церькви, на котрім брали участь і представителї Ґрекокатолицькой церькви на Словакії. Діскутовали о важных вопросах, котры дотуляють ся обидвох церьквей.
„Обидві церькви собі суть барз близкы. Ґрекокатолици на Словакії стали окремов митрополіёв о сім років скорїше, значіть, выміна скушеностей при формованю новых пасторачных і теолоґічных приступів была барз хосенна. Окрем ґеоґрафічной близкости нас капчають і історічны корїня, і актуалны соціалны выкликы, котры выжадують собі сполочный поступ,“ повів отець Іштван Шестак, протосінкел Гайдудороґской архієпархії.
Літурґічны тексты і жывот священиків
Дополудне діскутовало ся о хоснованю літурґічных текстів і публікацій при удїлёваню ініціачных тайн, як і о односинах межі причащанём дїтей і першым святым причастём. Пополудне єпіскопи діскутовали о вопросах, якы дотуляють ся священьского жывота – їх молитвового рітма, формації семінарістів, літурґічной освіты священиків і віруючіх, як і о далшых темах.
На сполочнім засіданю за мадярьку сторону брали участь Высокопреосвященый Філіп Кочіш – архієпіскоп і митрополіта гадудороґскый, Преосвященый Атаназ Орос – єпарха мішколцьскый, і Преосвященый Авел Сочка – єпарха ніредьгазьскый.
Із Словакії пришли Высокопреосвященый Йона Максим – архієпіскоп і митрополіта пряшівскый, архієпіскоп Кіріл Василь – кошіцькый єпарха, і Преосвященый Мілан Лах – помічный єпіскоп Братїславской єпархії.
Завершінём дня была вечур Літурґія оперед посвяченых дарів, в рамках котрой єпіскопи з Мадярьска і Словакії вєдно подяковали за десять років митрополії в Мадярьску.
Высокопреосвященый Філіп припомянув Ужгородьску унію
На літурґії тримав проповідь Высокопреосвященый Філіп, голова Ґрекокатолицькой церькви в Мадярьску. Владыка вказав на то, же в історічнім контекстї десять років може здати ся як довгый період, але в порївнаню з 379 роками од Ужгородьской унії із 1646-го року то лем куртый момент.
І кедь на тій події не быв участный ани мукачовскый єпарха Теодор Мацапула, ани помічный єпіскоп мукачовскый Ніл Лущак, владыкове загнали митрополітови Філіпови з нагоды юбілея основаня митрополії поздравне писмо.
Кір Філіп так само припомянув ключовы історічны дії, котры формовали тамтешню Ґрекокатолицьку церьков, котра є наслїдником Ужгородьской унії і Мукачовской єпархії. Владыка припомянув перше слызыня іконы Богородіцї в Маріяповчі в 1696-ім роцї, велике згромаджіня в Гайдудорозї в роцї 1868, путь до Рима в роцї 1900, коли пятьсто мадярьскых ґрекокатоликів принесло свої пожадавкы прямо Вселеньскому Архієреёви ці основаня Гадудороґской єпархії у 1912-ім роцї. Ку тым історічным меджам теперь належыть і основаня митрополії в роцї 2015.
На кінцю кір Філіп припомянув, же ікона Богородіцї в Маріяповчі є сімболом єдности ґрекокатоликів без огляду на граніцї.
Петро МЕДВІДЬ, ЛЕМ.фм, языкова і ґрафічна управа: АРК СР.
