23. 8. 2016: Музей Варгола святкує 25 років

Енді Варгол і вдяка політічній сітуації в Чехословакії перед роком 1989 ниґда не быв в отчізнї своїх предків. Наперек тому в Міджілабірцях, лем 15 кілометрів од села Микова, одкыль походили Варголовы родічі, по ёго смерти выникнув музей, котрый є присвяченый якраз тому світознамому умелцёви русиньского походжіня. Того року музей святкує 25 років од свого выникнутя.

Музей модерного уменя Енді Варгола в Міджілабірцях офіціално выникнув 1-го септембра 1991-го року. В тім часї быв єдиным такым музеём на світї. Днесь є єдным із двох, но все зіставать єдиным в Европі. Другый такый музей є в америцькім Піттсбурґу. Джон Варгола, Михал Бицко і Михал Ціглаж были головныма ініціаторами выникнутя того музею.

Бицко зачав занимати ся варголовсков історіов іщі почас штудентьскых часїв і поступно дійшов ку великому множеству цїнных інформацій, головно о походжіню умелця і дякуючі Варголовій найблизшій родинї і ку жывоту і творчости Варгола. Джон Варгола, котрый умер у 2010-ім роцї, і котрый быв віцепрезідентом Фундації Енді Варгола про візуалне уменя в Ню Йорку цїлый час музей в Міджілабірцях міцно підпоровав.

Музей почас рока навщівують тісячі навщівників із цїлого світа. Днесь є ёго зряджователём Пряшівскый самосправный край. Окрем творчости Варгола, в нім мож відїти і артефакты повязаны з умелцёвым жывотом – окрем іншого і кошульку, в котрій быв похрещеный. Но так само ся там орґанізують і выставкы іншых сучасных умелцїв, ці різны културны події, події про дїти і молодеж, все заміряны на вытварне уменя. В музею ся робить і освітня, і научно-бадательске  діятельство в области сучасного вытварного уменя, музеёедуколоґії.

Офіціалны святкованя 25-го юбілею выникнутя музею будуть проходити в четверь 25-го авґуста 2016-го року. Святочна академія в кіносалї Музею модерного уменя Енді Варгола зачінать о 11.00 год. Окрем того, є приготоволеный і супроводный проґрам. О третїй пополудни буде проходити інавґурація образів Кеіта Гарінґа, по ній на участных чекать вернісаж выставкы Їткы Копейтковой і Даніела Бродянія. Не буде браковати концерт ці театер. Детайлный проґрам найдете на плаґатї вправо горї.

П. М.