24. 3. 2025: Зборник Камо грядеши? доступный в друкованій і оналйн верзії

26-го і 27-го септембра 2024-го року на Пряшівскій універзітї в Пряшові проходила меджінародна научна конференція під назвов „Камо грядеши? Дінамічны процесы в сучасній карпаторусиністіцї.‟

Цїлём конференції была аналіза сучасного ставу карпаторусиністікы на Словакії за послїдню декаду, значіть од IV. Меджінародного конґресу русиньского языка, котрый одбыв ся в Пряшові у 2015-ім роцї.

В тых днях дістала ся нам до рук нова публікація, зборник, котрый обсягує рефераты, якы одзвучали на даній конференції. Едіторами зборника Камо грядеши? Дінамічны процесы в сучасній карпаторусиністіцї суть Валерій Падяк, котрый быв ініціатором конференції, і Михал Павліч, обидвоми робітници Інштітуту русиньского языка і културы Пряшівской універзіты в Пряшові. Зборник выдало Выдавництво Пряшівской універзіты.

Якраз Валеріёви Падякови є присвяченый і вступ до зборника з пера професора Павла Роберта Маґочія, кедьже наш літературознатель, высокошкольскый педаґоґ минулый рік одсвятковав півокруглый юбілей – 65 років, а конференцію робив при тій нагодї.

В зборнику, котрый має нецїлых 170 сторінок, суть надрукованы 11 статей од авторів із Словакії, Україны, Мадярьска, Канады і Споєных штатів Америкы. Меджі авторами суть такы познаты із карпаторусиньскых научных кругів  як уж споминаный Павел Роберт Маґочій, Анна Плїшкова, Володимір Фенич ці Маріянна Лявинець-Уґрин, але і далшы.

В зборнику мож найти і медіалны выступы з конференції, котры появили ся в пресї, ці фотоґрафічне здокументованя той події. Окрем того, же книжку, котрой тіраж є 200 фалатків, мож здобыти у орґанізатора конференції – Валерія Падяка, зборник є доступный і в електронічній формі на сайтї Інштітуту русиньского языка і културы Пряшівской універзіты в Пряшові.

Петро МЕДВІДЬ, ЛЕМ.фм, языкова і ґрафічна управа: АРК СР.