24. 4. 2025: Беатіфікація Петра Павла Ороса перенесе ся

Веджіня Мукачовской ґрекокатолицькой єпархії в четверь, 24-го апріля 2025-го року,  інформовало, же дата беатіфікації нового священомученика Петра Павла Ороса мусить перенести ся.

Беатіфікація мала одбыти ся в селї Білкы на Підкарпатю 3-го мая того року. Як веджіня єпархії інформовало, беатіфікація не зрушыла ся, але перекладать ся на іншу, теперь іщі незнану дату. Єпархія пояснила, же буде треба почекати на рїшіня нововыбраного Святїшого Отця.

„Почас остатнїх днів, од смерти Папы аж до вечора середы, мы вели неперестанный і завзятый діалоґ із Апостольсков нунціатуров на Українї, котрій подарило ся сконтактовати із одповідныма особами з Колеґії кардіналів,“ пише ся в офіціалнім выголошіню єпархії.

„Почас тых конзултацій дізнали сьме ся, же деякы з потребных документів, котры мав підписати Святїшый Отець Франціск про завершальне проведжіня беатіфікації, не встиг підписати почас жывота. В повязаню з тым проведжіня торжества беатіфікації на даній етапі стало неможливым.“

Як далше Мукачовска єпархія інформує у своїм выголошіню, з порозумінём прияло веджіня єпархії тото рїшіня Колеґії кардіналів, і высловлює вдячность вшыткым, котры проявили знакы солідарносати і підтримкы єпархії.

Єпархія просить вшыткых, жебы з довіров поставили ся ку тій сітуації і терпеливо очековали далшы офіціалны інформації. „Такой як будуть новины з Ватікану, мы обовязково о них будеме інформовати.“

Петро МЕДВІДЬ, ЛЕМ.фм, языкова і ґрафічна управа: АРК СР.