24. 7. 2018: В Тополї оправлять нагрoбный камінь Духновічового прадїда

В половинї місяця юл оголосила на своїм фанпейджі на сіті Facebook безпрофітова орґанізація Карпатьскы деревяны церькви (Karpatské drevené cerkvi, n. o.) голосованя під назвов Жебы ремесло жыло (Aby remeslo žilo).

Орґанізація здобыла суму 3 000 € од Фундації VÚB, вдяка котрым хоче зробити три ремеселны воркшопы заміряны на дерево і камінь, і оправити так три выбраны памяткы в реґіонї Снина, котры представлюють память той країны. Єдночасно тыма воркшопами хоче орґанізація вышколовати містных людей, вдяка котрым ся културна дїдовизна реґіону всокотить і про далшы ґенерації.

На поміч, котры памяткы выбрати на реконштрукцію, закликали собі своїх любителїв на сітї Facebook. Довєдна было номінованых сім обєктів у трёх катеґоріях: Камінь – оправа текстів, Камінь – спевнїня матерії і клеїня, і Деревяный шындель. До першой катеґорії были номінованы пісковцёвый хрест у селї Шмиґовець і такый самый хрест в селї Прислоп. В другій катеґорії мож было голосовати за нагробный камінь Василя Духновіча, пароха в Тополї і прадїда Александра Духновіча, нагорбный камінь Ота Гайдінґера, котрый быв справцём маєтку родины Сереніёвых і головным ініціатором выбудованя церькви в селї Дубрава, і пісковцьовый хрест в селї Колбасів. В катеґорії деревяного шындлю ся голосовало за Ґрекокатолицьку церьков св. Ґеорґія в селі Ялова і деревяну дзвініцю з Калной Розтокы.

Подля резултатів голосованя, котре закінчіло о півночі 20-го юла 2018-го року, орґанізація Карпатьскы деревяны церькви в близкім часї постарать ся о реконштрукцію пісковцёвого хресту в Шмиґовцї, нагробный камінь Василя Духновіча і церьков в селї Ялова.

 

Карпатьскы деревяны церькви

Безпрофітова орґанізація Карпатьскы деревяны церькви была заснована у 2012-ім роцї на прінціпі партнерства самосправ і обидвох церьквей выходного обряду (ґрекокатолицькой і православной). Орґанізація ся замірявать на гляданя достойных способів хоснованя церьквей в припадах, кедь їх із різных причін не мож хосновати на богослужіня. Окремо ся орґанізація орьєнтує на самосправы з цілём ефектівно схосновати потенціал деревяной церьковной архітектуры про розвиток економічно слабшых пригранічных реґіонів. Із той причіны є векшына актівностей в сучасности концентрована на окресы Снина і Собранцї.

П. М.

Script logo