24. 7. 2024: Высокопреосвященый Вілъям Скурла скликує Митрополітный собор

Высокопреосвященый Вілъям Скурла, піттсбурзьскый архієпіскоп і митрополіта, глава Митрополітной русиньской ґрекокатолицькой церькви в Споєных штатах Америкы оголосив скликаня Митрополітного собору.

Собор має проходити в днях 16-го аж 20-го юла 2025-го року у Храмі Пречістой Дївы Марії у Вайтінґу, штат Індіана.

Митрополітны церькви свого права (sui iuris) мають подля Кодексу канонів восточный церьквей обовязок скликовати собор найменше раз за пять років. Послїднїй Митрополітный собор Піттсбурґской митрополії проходив у 2013-ім роцї, коли на нїм як гость брав участь і владыка Ніл Лущак, помічный єпіскоп Мукачовской єпархії, втогдышній апостольскый адміністратор єпархії.

Митрополія меджі тым дістала нового пармского єпарху, котрым став владыка Роберт Піпта. Так само собі Піттсбурґска митрополія тот рік припомянула сто років од дня, коли быв Святїшым Престолом зрядженый Піттсбурґскый апостольскый екзархат про Русинів, з чого часом выросла митрополітна церьков.

Тот крок дефінітівно вырїшыв вопрос ґрекокатоликів у Споєных штатах, кедь роздїлив юрідікцію подля того, якой традіції і народности были віруючі. Окрім русиньского екзархату, котрый быв про віруючіх з Карпат – наслїдників Ужгородьской унії, выникнув і екзархат про віруючіх з Галічі – Українцїв, наслїдників Берестьской унії, із центром у Філаделфії.

Подля офіціалного писма підписаного кір Вілъямом із 10-го юла 2024-го року, котрым оголошать скликаня собору, уж теперь проходять приготовлїня на тоту важну подію, на котрій стрїтять ся єпіскопи, священици, монашество і лаіци Піттсбурґской митрополії.

„Цїлём собору є вєдно розрїзнити способы, як жыти нашу прославу Хріста днесь досправдовым і практічным способом, а єдночасно учіти ся з минулости, і смотрити до будучности,“ пише Высокопреосвященый Вілъям. В рамках собору будуть проходити формалны презентації, розговоры, панеловы діскусії ці округлы столы. „Собор є часом на святкованя унікатных вкладів каждого реґіону і єпархії, а єдночасно з тым то є вызнаня єдности Ґрекокатолицькой церькви у Северній Америцї.“

Митрополітный собор є порадным орґаном митрополітной церькви sui iuris, котрый митрополітови і Радї єрархів дає рады в дїлах векшого значіня, главно апостолату і церьковной дісціпліны. Митрополітный собор веде митрополіта.

Членами суть єпіскопи, представителї священиків, монашества і лаіків. Цїлый процес Митрополітного собору рядить ся прінціпами, котры суть записаны в Кодексі канонів восточных церьквей і Штатутом Митрополітного собору. Заключіня собору, по рїшіню Рады єрархів, ся мають публіковати в документї, котрый є обовязуючім, жебы служыли далшому розвитку жывота містной церькви.

Петро МЕДВІДЬ, ЛЕМ.фм, языкова і ґрафічна управа: АРКСР. Фото: Нік Кіта.