24. 9. 2018: Молоды.Русины орґанізуют школы танця

28. вересня/септембра 2018 р. в Культурным Домі в Старій Любовни пройде дальша подія орґанізувана обществом молоды.Русины. В рамках проґраму буде мож взяти участ в школі танця ай выслухати выклад пн. «Товды і днес – соткы років попри собі».

Подія пройде в рамках спілпрацы общества молоды.Русины з містом Стара Любовня. Акция вписана є в проґрам 27. Любовняньского Ярмаку, котрий зачне ся о 18.00 год. доповідю на тему «Родинна традиция нацийональных меншын Выжнього Спиша», котру поведе Катерина Бабчакова.

Надале о год. 19.15 зачне ся спомнена школа танця орґанізувана русиньском молодежом. Найперше поведут ю Марек Сабол та Катерина Бабчакова. Запрезентуют они народны танці Русинів з Якубян та танці карпатскых Німців Выжнього Спиша. Завершыньом проґраму буде забава з народном музыком Радослава Кертіса з Кошыц.

Вступ на подію єст дармовий, а проєкт «Товды і днес – соткы років попри собі», будучий серийом варштатів, цілю котрого є ввести школы танця і до окресу Стара Любовня, реалізуваний єст завдякы фінансовій підпорі з Фонду на Підпору Культуры Нацийональных Меншын. Фонд зосереджат ся на меншынах, котры роками жыли попри собі на териториі Выжнього Спиша, а предовшыткым на русиньскій та німецкій меншынах.

CЕВЕРИЯН КОСОВСКЫЙ, жрідло: лем.фм

(Публікуєме в оріґіналї – лемківсім варіантї русиньского языка.)