25. 1. 2018: Юрій Штенё здобыв Крішталёве крыло

В недїлю 21-го януара 2018-го року проходило в Братїславі, в просторах Словацького народного театру, передаваня оцїнїнь Крішталёве крыло 2017 (Krištálové krídlo 2017). Як інформовала словацька державна пресова аґентура ТASR, в рамках ХХІ. річника того престіжного оцінёваня было номінованых 29 особностей. Цїлково здобыло оцїнїня 11 лавреатів, о котрых рїшыли одборны пороты і Велика журїі Крішталёвого крыла. Міджі оціненима быв і Юрій Штенё, котрый здобыв выняткове оцїнїня.

 

Юрій Штенё

Професор Юрій Штенё, родак із русиньского села Кленова, є вызначным одборником в области неврохірурґії, декан Медічной факулты Універзіты Коменьского в Братїславі і донедавна довгорічный предноста Неврохірурґічной клінікы Медічной факулты Універзіты Коменьского. Створив методу мапованя нервовых драг електрічнов стімулаціов почас мікрохірурґічных операцій мозґу, як і класіфікацію надорів (туморів) мозґу в области третёй мозґовой коморы, котра є цїлосвітово принята.

Є автором веце як 400 фаховых публікацій і понад 600 лекцій по цїлім світї. Быв оцїненый Честным узнанём Світовой федерації неврохірурґічных обществ за розвиток неврохірурґії на благо людства. В роцї 2015 быв записаный міджі 16 найвызначнїшых неврохірурґів на світї. В роцї 2007 му презідент Словацькой републікы Іван Ґашпаровіч удїлив державне оцїнїня Хрест князя Прибіны 1-ой класы за розвиток неврохірурґії.

 

Крішталёве крыло

Крішталёве крыло є оцїнїня удїлёване шторік од 1997-го року особностям на Словакії, котры досягли у своїй професії выняткову одборность і успіх. Головнов думков Крішталёвого крыла є обявлёваня і пропаґація унікатных людей і їх професіоналных выконів, котры собі залужать честованя.

Оцїнїня ся передавають в катеґоріях філантропія, господарьство, архітектура, публіцістіка і література, театер і авдіовізуалне уменя, вытварне уменя, рок, поп джез музика, шпорт, медіціна і наука. Удїлюють ся і вынятковы цїны за цїложывотне дїло, вынятковый успіх в загранічу ці інше діятельство.