25. 10. 2018: В Мікулашовій посвятили памятник І. світовой войны

20-го октобра 2018 на верьшку Каштелик коло села Мікулашова (стара русиньска назва села была Никлова) торжественно посвятили памятник, котрый припоминать бої І. світовой войны.

Як інформовав словацьку державну пресову аґентуру TASR председа Клубу воєньской історії Бескиды Мартін Дробняк, на торжестві брало участь коло 60 людей. Памятник, котрый посвятив ґрекокатолицькый і православный воєньскых духовный, творить камянный моноліт – пункт стрічі вояків, і 39 деревяных стовпів. Стовпы мають вытворити в навщівникови чутя тиску, стиснутя, котре пережывали вояци. Суть зроблены з двох матеріалів, што сімболізує дві воюючі армады.

Як высловив ся клуб на своїм профілї на сітї „Facebook‟, в прекрасній сценерії карпатьскых гір звертають памятником увагу на то, же перед сто роками быв тот край засягнутый тяжкыма боами.

 

Гора смерти

Верьх Каштелик представлёвав важный обранный пункт австро-угорьской армады. У фебруарї і марцї 1915-го року проходили о тот пункт кровавы бої, котры выжадали собі тісячі жывотів вояків. Бої были, як інформує клуб, такы страшны, же верьшок дістав меджі людми назву Гора смерти.

„Люди, котры глубше занимали ся подіями І. світовой войны, знали о значіню того місця, но звычайны турісты ту не ходили. І зато сьме ку памятнику збудовали научну стежку, котра має коло три кілометры і траса дасть ся перейти за прибижно дві аж три годины,“ повів про аґнетуру Дробняк, і єдночасно припомянув, же в рамках той стежкы зробили ся і інформачны панелы.

 

В Мікулашовій суть уж довше

Клуб воєньской історії Бескіды діє в Мікулашовій уж довше. В роках 2014 аж 2017 там клуб обновлёвав воєньскый цінтерь.

Будованя памятника зачало в юні 2017-го року, найкомплікованїшый быв транспорт матеріалу на місце бывшого поля боя. Реалізація памятника была подля Дробняка можна вдяка підпорі з проєкту „Networld‟, котрый перепаять дїдовизну І. світовой войны в дунайскім реґіону. Памятник і стежку підпорили і села Нижня Полянка а Мікулашова. Фінанції дала і австрійска орґанізація Чорный крест.

Клуб воєньской історії Бескиды із нагоды посвячіня памятника написав, же і тот памятник має припоминати людям, котры підуть коло нёго, же покійный жывот в мірї не є штось, же існує природно.

Петро МЕДВІДЬ, жрідло фотоґрафії: Klub vojenskej histórie Beskydy“

Script logo