25. 12. 2017: Меджінародный семінар ку Рамковому договору на охрану народностных меншын в СР
Участници меджінародного семінара за русиньску народностну меншыну Анна Плїшкова і Мартін Дуфала.
В рамках діалоґу о выслїдках імплементації Рамкового договору на охрану народностных меншын (РДНМ) в СР зорґанізовав уповномоченый влады СР про народностны меншыны Ласло Буковскый у сполупраці із Секретаріатом Рамкового договору на охрану народностных меншын 4. і 5. децембра 2017 у Готелї „Bôrik“ у Братїславі меджінародный Follow-up семінар ку імплементації Рамкового договору на охрану народностных меншы в СР.
Подія, котра ся складала з четырёх панелів, одтворили уповномоченый влады СР про народностны меншыны і віцепрезідетка Порадного выбору РДНМ Бріґітта Буш. У вступі події презентовали члены порадного выбору Невен Анделіч і Райніс Аболтінш главны заміры і основны пропозіції 4. оцїночной справы о Словацькій републіцї.
В рамках першого панелу, котрый быв заміряный на підпору толеранції, взаємного решпекту і інтеркултурного діалоґу, выступила з рефератом верейна охранкыня прав Марія Патакіова, прозвучав і выступ міністеркы справедливости СР Луції Жітнянской і уповномоченого влады СР про людьскы права, народностны меншыны і родову рівность Калман Петец.
У другім панелї, котрый быв заміряный на выхову і навчаня народностных меншын, быв створеный простор про выступ Петра Крайняка, штатного таёмника Міністерства школства, наукы, баданя і шпорту СР. К даній проблематіцї своїма выступлїнями приспіли тыж Тібор Тот, член Выбору про народностны меншыны і етнічны ґрупы, Анна Плїшкова з Інштітуту русиньского языка і културы Пряшівской універзіты в Прашові і Юлія Враблёва із „Studia Ascademica Slovaca“ Філозофічной факулты Універзіты Коменьского у Братїславі.
Темов далшого панелу была охрана і розвиток културы і языків народностных меншын. До діскусії прияли позваня штатный таёмник Міністерства културы СР Конрад Ріґо, говорця Округлого стола Мадярів Ґейза Токар, представителька обчаньского здружіня „Minorita“ Зузана Куманова, директорка канцеларії Уряду уповномоченого влады СР про народностны меншыны Алена Котванова і прадставитель Округлого стола Русинів Словакії Мартін Дуфала.
В панелї, котрый завершовав проґрам семінара, быв членами Порадного выбору РДНМ представленый 4. темантічный коментар: Россяг діятельства Рамкового договору на охрану народностных меншын. Позіцію ку тому вызначному документу презентовав уповномоченый влады СР про народностны меншыны, членка Выбору про народностны меншыны і етнічны ґрупы Едіт Бауер а як незавіслый експерт Калман Петец.
На конець уповномоченый влады СР про народностны меншына оцїнив ход події і высоку уровень діскусії меджі членами Порадного выбору РДНМ і притомныма представителями централных орґанів штатной справы, представителями народностных меншын, як і одборників з академічной среды, што ся занимають охранов народностных меншын.
