25. 4. 2018: Конкурс про наймолодшы способны дїти – «Дітина в фольклорі»

Орґанізаторы фестівалю «Дітина в фольклорі» вказуют, што фольклор може быти файний і інтересувати аж і наймолодше поколіня. Того рока проходила буде ювілейна, 25. едиция фестівалю, на котрий іщы до кінця мая мож зголошувати участ малых артистів.

«Дітина в фольклорі» то єден з барже кольоровых, радістных, розспіваных дітячых фестівалів в Польщы. Од більше як двадцетьох років до Баранова Сандомєрского, де проходит подія, приізджают малы співакы, інструменталисты, танцюристы з цілой Польщы. Тогорічна едиция одбуде ся 17. червця/юнія. Орґанізатор, Містно-Ґмінний Осередок Культуры в Баранові Сандомєрскым, заявил, што жде на зголошыня участи в фестівальовым конкурсі.

Незмінні головном цілю акциі є охорона і популяризация загыбаючых видів фольклору, што сут звязаны з дітячом темом, та вказуваня і одкрываня його богатства. Важным є і розвиваня нацийональной достоменности, вчыня діти, што свою дідовизну треба плекати і мож тото робити в інтересуючий спосіб. Фестіваль то тіж нагода для малых артистів вказати ся, похвалити ся свойом культуром і познавати інчы нациі, етнічны ци реґіональны ґрупы.

Фестівальовий конкурс обнимат пару катеґорий. Сут то:

• співочы ґрупы,
• солисты,
• обрядовы ґрупы,
• інструменталисты,
• гуляючы ґрупы.

Участникы выступувати будут перед конкурсовом комісийом, в склад котрой входят етноґрафы. Передвидувана є грошова нагорода та фіґурка деревяного Птока-Клепока, ручні рыхтувана специяльні на тоту нагоду. Што рока має она інчий кольор.

Окрем конкурсовых переслухань в проґрамі сут варштаты і показы. Діяла буде тіж отворена пленерова сцена, на котрій охочы будут мочы музыкувати. В пляні несподіванкы – так для участників, як і публикы.

Наталія МАЛЕЦКА-НОВАК

(Публікуєме в оріґіналї – лемківскім варіантї русиньского языка.)