25. 8. 2025: Презентація книжкы Александра Керестеші у Виноградові

В четверь, 21-го авґуста 2025-го року, у Виноградівскій централній публічній бібілотецї одбыла ся презентація книжкы русиньского писателя Алексансдра Керестеші під назвов Пійсят из Човлентом.

Літературну подію орґанізовало Закарпатьске областне науково-културолоґічне общество імени Александра Духновіча, котрого голова – Юрій Продан, быв і модератором презентації. Як інформовала бібліотека, Продан у вступнім приговорї підкреслив значіня той книгы і пожелав авторови далшы творчі успіхы.

На події приговорив ся і Юрій Шиповіч, председа Русиньского културолоґічного клубу, підкарпатьскый корешпондент радія lem.fm, котрый подїлив ся із своїма чувствами односно творчости Александра Керестеші.

Віршы Александра Керестеші звучали в четверь у выконаню Тетяны Микиты, Марічкы Рацин i Тетяны Рацин, котра так само пише стихы по русиньскы. Атмосферу літературной стрїчі в бібліотецї збогатив музичный проґрам у выконаню Роберта Тіводора, Антона Галаса і Василя Січа.

Александер Керестеші (р. 1975) є родаком із села Дротинцї на Підкарпатю. Пише по русиньскы під своїм меном, але і під псевдонімами. Ёго творы мож найти і в зборниках Алманах днешньої русинської літературы, котры выходять шторік на Підкарпатю і презентують нову, сучасну русиньску літературу того реґіону.

Петро МЕДВІДЬ, ЛЕМ.фм, языкова і ґрафічна управа: АРК СР