25. 9. 2016: 80-річа лінґвісты-кодіфікатора доц. ПгДр. Василя Ябура, к. н.

Языкознатель і педаґоґ Василь Ябур ся народив 28. октовбра 1936 у Стащінї у бывшій Чехословакії, скінчів Высoку школу російского языка і літературы в Празї (1954 – 1958), на Універзітї  Коменьского в Братїславі здобыв тітул доктора філозофії (1968), потім тамже кандідата наук (1987) і доцента (1991). Учів на Педаґоґічнім інштітутї в Кошіцях (1961 – 1964), Педаґоґічній факултї в Пряшові Універзіты П. Й. Шафаріка в Кошіцях (1964 – 1978), Катедрї языків УПЙШ в Кошіцях (1978 – 1988) і на Педаґоґічній факултї в Нїтрї (1988 – 1993).Од зачатку 90-ых років ХХ. ст. зачав ся занимати кодіфікаціов русиньского літертурного языка на Словакії. Быв директором Інштітуту русиньского языка і културы при Русиньскій обродї в Пряшові (1994 – 1995).

Робив у пряшівскій філії Штатного педаґоґічного інштітуту в Братїславі (1995 – 1998), в тім часї склав проґрам навчаня русиньского языка про основны школы в Пряшівскій области, котрый быв схваленый МШ СР і заведеный до школ од 1997 року. Але іщі перед тым у 1995 роцї, вєдно з доц. ПгДр. Юріём Паньком , к. н., быв главным кодіфікатором русиньского языка на Словакії, свячочне выголошіня якого ся одбыло 27. януара 1995 у Братїславі. Од року 1998 доднесь учіть морфолоґію і сінтаксіс у сучаснім Інштітутї русиньского языка і културы Пряшівской універзіты в Пряшові, котрый перешов різныма назвами. Є автором або сполуавтором многых научных публікацій і учебників русиньского языка.

З нагоды ёго приближаючого ся юбілею – 80 років од дня народжіня редакція нашых новинок і їх чітателї желають науковцёви місце здоровя, родинне щастя і робочі успіхы. На многая і благая лїта!

(Шыршый матеріал о нашім юбілантови принесе чісло 5 часопису Русин.)