25. 9. 2021: Меджі найлїпшыма книжками ПСК три русиньскы і єдна о Русинах

Мена вітязів орґанізаторы выголосили почас фестівалу Пряшів любить чітати.

І тот рік Пряшівскый самосправный край (ПСК) у сполупраці з Крайсков бібліотеков Павла Орсаґа Гвієздослава выголосили конкурз під назвов Книжкы рока ПСК 2020. Быв то вже 4-ый річник того конкурзу.

Святочне передаваня оцїнїнь з выголошінём вітязів одбыло ся в середу, 22-го септембра 2021-го року, в просторах Центра реґіоналных документів у Пряшові почас літературного фестівалу Пряшів любить чітати (Prešov číta rád).

Конкурз мав дві катеґорії

„Цїлёом того конкурзу є пропаґація і підпора реґіоналной літературы выданой в попереднім роцї, повязаной з реґіонами нашого краю тематічно, особов автора, текстом або образовов частёв,“ інформовала Івета Гурна, директора бібліотекы.

Конкурз мав дві катеґорії. До першой належала красна література а література про дїти і молодеж. До другой катеґорії належала одборна література, включно словарів, енціклопедій, духовной, публіцістічной і популарно-научной літературы.

„До конкурзу сьме прияли 40 номінацій, з того 16 тітулів з белетрії і 24 з научной літературы,“ інформовала Анна Зборанова з Методічного оддїлїня бібліотекы. В порівнаню з попереднїм роком є чісло номінацій дакус менше, но то подля Зборановой овпливнила і сітуація повязана з ковідом.

Оцїнены три русиньскы книжкы

Новотов 4-го річника были одборена пороты. В катеґорії красной літературы і літературы про дїти і молодеж на другім місцї скінчіла подля оцїнкы пороты по словацькы написана книжка Петра Мішака а Петра Вырлика з назвов Повісти і пригоды карпатьскых Русинів (Povesti a príbehy karpatských Rusínov).

В катеґорії папуларно-научна література одборна порота удїлила перше місце по русиньскы выданій книжцї довгорічного русинського актівісты, етноґрафа Яна Калиняка зо Свідника під назвов Русиньскы народны співанкы (Том 1), котру выдала Окресна орґанізація Русиньской оброды у Свіднику.

Якраз председа свідницькой оброды Мілош Стрончек перевзяв оцїнїня в Пряшові, кедьже автор з причіны довгодобых здравотных проблем не міг взяти на святочній події участь.

Русиньска література мала успіх і в рамках інтернетового голосованя, до котрого ся міг залучіти каждый заінтересованый. Ціїу публікы здобыла в катеґорії белетрії русиньска збірка духовных стишків про дїти під назвов Напю ся водічкы од Людмілы Шандаловой. В катеґорії одборной літературы голосуючі на перше місце дали книжку далшого русиньского етноґрафа і актівісты зо Свідника Івана Чіжмаря під назвов Народный крой Русинів на фотоґрафії.

З номінованых книжок Крайска бібліотека Павла Орсаґа Гвієздослава в Пряшові приготовить путовну выставку, котра поступно перейде вшыткыма реґіоналныма бібліотеками, котрых зряджователём є Пряшівскый самосправный край.

Петро МЕДВІДЬ, ЛЕМ.фм. Ґрафічна і языкова уіправа: ред. АРК в СР. Жрідлфо ґотоґрафії: Podduklianska кnižnica Svidník.