26. 10. 2020: Турістічный рух в ПСК в лїтнїх місяцях ожыв. В дакотрых окресах чісла лїпшы як рік тому

Пандемія нового тіпу коронавірусу векшынов приносить планы вісти. Но в припадї турістічного руху в Пряшівскім самосправнім краї (ПСК) мож говорити в рамках лїтнїх місяцїв о розвитку. Главно у домашнїх навщівників.

„Наряджіня повязаны з пандеміёв коронавірусу запричінили, же в юли і авґустї того року евідумєме в Пряшівскім краю 650-тісяч переночовань домашнїх навщівників, покля у 2019-ім роцї то было лем 600-тісяч. Наопак, чісло переночовань чуджінцїв было в лїтї 2020-го року лем 197-тісяч, покля минувшый рік то было аж 332-тісяч,“ інформовав Марек Гудак з Інштітуту розвитку Пряшівского самосправного краю.

Юл і авґуст скоро єднакый як перед роком

Покля в місяцях апріль, май і юн того року турістічный рух значно заоставав за 2019-ым роком в кількости переночовань і чісла навщівників, юл і авґуст в ПСК досягли скоро єднаку уровень, як в попереднїм роцї.

Кількость переночовань в юли 2020-го року дістала ся на уровень скоро 88 процент в порівнаню з попереднїм роком, авґуст докінця быв аж на уровни 95-ёх процент. Што до чісла навщівників, юл 2020-го року досягнув в порівнаню з попреднім роком понад 90-процентну уровень, і авґуст аж 99-процентну, кедь оцїнюєме єднакы місяцї в двох по собі ідучіх роках.

Дакотры окресы были на тім іщі лїпше

Як далше інформовав Марек Гудак, є інтересным, же аж у восьмых із тринадцятёх окресів ПСК было у місяцях юл і авґуст 2020-го року зазначене докінця высше чісло домашнїх навщівників із Словакії, як перед роком. Ішло о окресы Гуменне, Кежмарок, Меджілабірцї, Левоча, Попрад, Снина, Стропків і Свідник.

В шестёх окресах дішло докінця ку нароснутю кількости навщівників обще, значіть домашнїх і загранічных вєдно, і то конкретно в Гуменнім, Кежмарку, Меджілабірцях, Снинї, Стропкові і Свіднику.

„Полонины, Домаша і далшы турістічны дестінації ся такым способом тїшыли почас тогорічного лїта векшому інтересу, як то было почас лїтнїх місяцїв у попереднїх роках,“ закінчів Гудак.

Петро МЕДВІДЬ, лем.фм, жрідло фотоґрафії: www.sopsr.sk, языкова управа: ред. АРК в СР.