26. 3. 2025: Вышов новый зборник Studium Carpatho-Ruthenorum 2024

В тых днях дістала ся нам під рукы нова публікація з Выдавательства Пряшівской універзіты (Vydavateľstvo Prešovskej univerzity). Інштітут русиньского языка і културы Пряшівской універзіты выдав науковый зборник Studium Carpatho-Ruthenorum 2024.

То вже 16-ый річник штудій з карпаторусиністікы. Головнoв едіторков і одповіднов редакторков зборника є Кветослава Копорова, робітнічка русиньского інштітуту в Пряшові.

Зборник традічно в попереднїх роках обсяговав тексты рефератів, якы одзвучали в данім роцї в рамках ціклу семінарів карпаторусиністікы, котры інштітут орґанізує. То довгорічна актівность нашой універзітной інштітуції. Зборник векшынов быв доповненый і о даякы далшы научны статї, штудії.

Тот рік є зобрник дакус вынятковым. Інштітут русиньского языка і културы в минувшім роцї зорґанізовав лем єден семінар карпаторусиністікы, і так векшыну статей творять авторы, котры не выступали з даным мартеріалом в рамках семінарів.

Єдинов выступаючов на семінарї карпаторусиністікы в минувшім році была докторандка нашого інштітуту Домініка Новотна, котра обробила тему під назвов Ку ґенезї еміґрантьской літературы карпатьскых Русинів в США. Од братств і обществ к літературным творам.

Зборник обсягує сім статей, причім ся в нїм чітателям научного часопису Studium Carpatho-Ruthenorum представить веце дебутантів.

Меджі них належыть Давід Франта із Западочеськой універзіты в Пылзнї, якый занимать ся у своїм матеріалї темов рутеністічного дїла Антоніна Гартла головно в контекстї звязів на Владислава Ванчуру. З той самой універзіты є і Анастасія Франта, котра обробила тему заникнутя і вокалізації єрів в русиньскім языку на матеріалї найстаршых памяток Карпатьской Руси.

О асімілації русиньского населїня на выходній Словакії в другій половині XX. столїтя на прикладї села Баньске пише далшый дебутант в зборнику – Тімофей Федор, якый є етноґрафом Словацького народного музея – Музея русиньской културы в Пряшові.

В Studium Carpatho-Ruthenorum 2024 далше найдеме статї Кветославы Копоровой, Анны Плїшковой ці Михала Павліча, котры дїють на Інштітуті русиньского языка і културы ПУ в Пряшові.

Петро МЕДВІДЬ, ЛЕМ.фм, языкова і ґрафічна управа: АРК СР.