26. 6. 2017: Знаме проґрам Русиньской ватры

В днях 14-го аж 16-го юлія 2017-го року вже по осмый раз буде проходити в Малім Липнику фестівал під назвов Русиньска ватра, котрого головным орґанізатором є молодежна орґанізація молоды.Русины. І тот рік чекать на участных богатый проґрам.

Думка ватры, як інформовав Петро Штефаняк, основатель фестівалу і бывшый председа орґанізації молоды.Русины, выникла перед девятьома роками, коли одбыв ся нултый річник. Основнов іншпіраційов про реалізацію фестівалу было про Штефаняка то, же видів културну декаденцію цілой тзв. Попрадьской долины коло його родного села Малый Липник.

„Села, в котрых даколи діяли ансамблі, орґанізовали ся різны події, перестали жыти і тым ся вытрачала і ідентічность. Цільом ватры было навернути до долины традіції і надвязати і на ансамблі а фестівал, котрый ся довгы рокы робив в селі Леґнава. Назву Русиньска ватра єм выбрав як сімбол соналежности з Лемківсков ватров (на чуджіні), яка ся робить і є в многім взором, бо є то місце де ся сходять нашы люди,“ повів про редакцію Штефаняк.

Русиньска ватра каждым роком ставать ся веце популарнов і притягує веце людей, і тых, котры не суть з окресу Стара Любовня. Штруктура фестівалу є збудована нелем на презентації традічной културы, але і далшых аспектаы, котры приналежать ку русиньскій ідентічности. Окрім фолклору є подія обогачена о супроводны проґрамы – лекції, промітаня, выставкы.

„Тот рік ватра спаять фолклор, културу, духовно і шпортовы актівности. Ватра буде од пятніці до неділі. Візійов є, жебы до будучна тоты три дні наповно презентовали Русинів, і жебы ся ватра стала місцьом, де ся сходжають Русины зо вшыткых держав. Од початку маю намагу вытворити шатрове містечко, што ся барз не дарить. Значіть, тото бы і мене потішыло, кібы акція притягля людей, котры собі повідять, же ся їм ту оплатить прийти зо шатром,“ говорить основатель фестівалу Петро Штефаняк.

Фестівал того року має богатый проґрам. Тішыти ся можете на Тріо Кантар, ФК Рутенія, солістів Шаффовой острогы, Маріяну Железну, доу Василенко – Блыха, Русин Чендеш Орхестра і многых далшых. Браковати не буде ани школа танця із професіоналами а на своє собі прийдуть тот рік і любителі фотбалу. На змаганя у мініфотбалі має прийти і команда з Лемковины. Детайлный проґрам найдете долов на плаґаті.

Петро Медвідь

(Публікуєме в оріґіналї автора.)

 

Script logo