26. 8. 2018: Кандідатуру на пріматорку Снины выголосила Ґаландова

В слїдуючіх комуналных вольбах, в котрых ся в новембрї 2018-го року будуть на Словакії выберати пріматоры міст, старостове сел і посланцї містьскых і сільскых заступительств, буде на функцію пріматоркы міста Снина кандідовати і Даніела Ґаландова. Офіціално то выголосила 24-го августа 2018-го року.

„Дішла єм до рїшіня – по веце як 16-ох роках жывота в Снинї, а думам же і смыслуповной роботї про тот красный реґіон, котрый став моїм домовом і домовом моїх трёх дітей – кандідовати за пріматорку Снины,“ написала на своїм профілї на соціалній сітї Facebook Ґаландова.

 

Депутатков уж вісем років

Даніела Ґаландова (40) выштудовала Катедру служеб і турістічного руху на Економічній універзітї в Братїславі. Од 2004-го року пріватно подникать. Має за собов успішно закінчены меншы і векшы проєкты, котры містным людям принесли новы робочі місця, навщівникам реґіону Снина новы службы. Окрем іншого, занимать ся всокочінём памяток і їх ефектівным выхоснованём в културнім турістічнім русї. Так само была орґанізоторков двох петіцій, котры, як пише на своїй сторінцї, вказали людям, же довєдна годны суть змінити сітуацію.

Ґаландова є од 2010-го року посланкынёв Містьского заступительства в Снинї. Кандідовала як непартійна, незалежна кандідатка. Просадила дакілько пропозіцій, котры принесли транспарентнїше інформованя о приготовлёваных інвестіціях в містї, лїпшы можности залучаня ся жытелїв до вырїшованя о дїлах публічных, але і заведжіня сістемовых правил про сохранїня і реґуларну старостливость о памяткы Снины.

 

Актівна і в русиньскім русї

Хоць Даніела Ґаландова не є русиньского походжіня і до міста Снина лем переселила ся, вже дакілько років діє в области всокочіня русиньскых памяток, причім ся анґажує і в русиньскім русі.

На переломі років 2011 і 2012 была співосновательков безпрофітовой орґанізації Карпатьскы деревяны церькви (Karpatské drevené cerkvi, n. o.), в котрій має функцію директоркы, што є неплачена функція.

Безпрофітова орґанізація Карпатьскы деревяны церькви была заснована на прінціпі партнерства самосправ і обидвох церьквей в ыходного обряду (ґрекокатолицькой і православной). Цілём є сполочный поступ при всокочіню, обнові і презентації деревяных храмів. Орґанізація ся замірявать на гляданя пристойных способів хоснованя церьквей в припадах, кедь їх із різных причін не мож хосновати на богослужіня. Окремо ся орґанізація орьєнтує на самосправы з цілём ефектівно схосновати потенціал деревяной церьковной архітектуры про розвиток економічно слабшых пригранічных реґіонів.

Якраз через тоту орґанізацію Ґаландова залучіла ся і до русиньского руху, коли Карпатьскы деревяны церькви стали членом Округлого стола Русинів Словеньска. Кедь русиньска платформа зачала у 2012-ім роцї робити на документї під назвов Проґрам розвитку русиньской народностной меншыны в Словацькій републіцї, Ґаландова стала коордінаторков єдной із пятёх частей документу під назов Села і міста. Документ быв схваленый і публікованый у 2015-ім роцї.

 

Публікації і оцїнїня

Ґаландова є аврторков дакілько публікацій. В їй авторстві можеме найти турістічного проводника Деревяны храмы восточного обряду на словацько-україньскім пригранічу: Полонины, Вігорлат, Ужаньска долина, далшого проводника під назвов Біціґльова стежка ікон ці публікацію Реґіон Снина. Приготовльовала і далшы мапы ці іформачны брожуры.

Робота Даніелы Ґаландовой, котра є і на хосен Русинів і їх краю, дістала уж свої резултаты і в подобі оцїніня і двох номінацій на оцїніня. У 2013-ім роцї здобыла Премію Австрійского червеного хреста за довгодобу поміч при обнові войновых цінтерїв і всокочіню памяти на дії Першой світовой войны. У 2016-ім роцї была номінована на Ціну Словацькой републікы за країну 2016, што выслужыла собі за актівность Біціґльова стежка ікон Новоселиця – Іновець. Далшу номінацію мала в році 2018 в рамках Народной премії ICOMOS Словакія Дїідовизна про будучность 2018 за актівіту STAVKIRKE – деревяны храмы в Норвеґії – іншпірації про Словакію.

П. М.

Script logo