27. 2. 2025: В Ужгородї одбыв ся юбілейный творчій вечур Івана Завадяка

Як інформує портал підкарпатьского русиньского журналу Отцюзнина, 22-го фебруара 2025-го року в Ужгородьскій публічній бібліотецї писатлеь Іван Завадяк одпрезентовав нову автобіоґрафґічну книгу під назвов Налице тай нарубы.

„Темов того выданя стали явны і тайны аспекты совєтьского періоду в жывотї як автора (котрому, подля ёго слов, і самому пришло быти шрубов у совєтьскій машынї), так і краю,“ пише портал.

Іван Завадяк минувшый рік святковав півокруглый юбілей – 85 років. Публікує по русиньскы курто, но продуктівно. Першы ёго творы вышли в журналї Отцюзнина у 2017-ім роцї. Книга Налице тай нарубы заперать автобіоґрафічну трілоґію, котра почала романом у новелах Брызґы споминӱв из дітвацтва (2019 р.), і трёма повістями, зобратыма довєдна під назвов Выпровбалованя любовльôв (2021 р).

О новім выданю, але і о авторови, на події бісїдовали Михаіл Белень – русиньскый художник, скулптор, ґрафік, дале літературознатель Іван Сенько, Михаіл Зан, якый написав і спредслово до книгы, Анна Меґела, яка робила коректуру выданя, брат автора Михаіл Завадяк, і головный редактор журнала Отцюзнина Юрій Шиповіч.

Іван Завадяк (24-ый септембер 1939 р.) є родаком із підкарпатьского села Новоселиця. Абсолвовав штудії на Ужгородьскій державній універзітї. В области културы, школства, общественно-політічного жывота, правной охраны дїє понад пів столїтя. По русиньскы публікує од 2017-го року.

Петро МЕДВІДЬ, ЛЕМ.фм, языкова і ґрафічна управа: АРК СР. Жрідло фотоґрафії: Отцюзнина.