27. 6. 2024: Редакція журнала Отцюзнина стрїтила ся з меценатами з Америкы

Як інформовав русиньскый журнал Отцюзнина із Підкарпатя на своїм вебсайтї, 24-го юна 2024-го року одбыло ся засїданя редакчной колеґії, сполуробітників і дописователїв того журнала.

„На події підняли ся важны вопросы за языкову і редакчну політіку, будучность выдаваня, перезентовала ся штатістіка вебсайту і соціалных сітей журнала вєдно із проґнозами далшого роснутя,“ пише журнал.

На засїданю были тот раз присутны і представителї америцькых Русинів. Посмотрити роботу редакції пришов професор Павел Роберт Маґочій за Карпаторусиньскый научный центер, котрый має важну роль в тім, же журнал подарило ся в минувшім роцї обновити, а так само Марія і Мері Кетрін Сілвестрі із Фундації Джона і Гелен Тімо.

„Якраз із фінанчнов підопоров тых двох орґанізацій на днешнїй день выдає ся Отцюзнина, за што сьме їм дуже вдячны.“

Засїданя проходило в Ужгородї, де америцькы Русины пришли із Пряшова, кедьже три тыжднї присвятили тому місту з нагоды проходжіня Studium Carpato-Ruthenorum 2024 – Меджінародной лїтнёй школы русиньского языка і културы.

Тоты дві орґанізації окрім іншого довгодобо підтримують посередництвом штіпендій і штудентів, котры на лїтню школу до Пряшова хотять прийти.

На засїданю брав участь і голова Народной рады Русинів Закарпатя Євген Жупан, птредседа орґанізації Карпатьскый Русин Васлиль Щербей, і далшы.

„Радостёв про рeдакчну колеґію є, же меценаты і далше мають дяку фінанцовати журнал, котрый стає з каждым выданём лїпшый,“ написав шефредактор журнала Отцюзнина і голова Русиньского културолоґічного клубу Юрій Шиповіч.

Петро МЕДВІДЬ, ЛЕМ.фм, языкова і ґрафічна управа: АРК в СР.