27. 8. 2025: Юбілуючій ПУЛС іде як главный пункт проґраму до японьской Осакы

Професіоналный русиньскый ансамбель – Піддукляньскый умелецькый людовый субор (ПУЛС), тот рік святкує 70 років од свого выникнутя. Як інформовало Оддїлїня комунікації Пряшівского самосправного краю (ПСК), котрый є зряджователём ансабмлю, ПУЛС при тій нагодї на кінцю того року одпремєрує новый цїловечурнїй проґрам.

ПУЛС за 70 років свого єствованя выступав у многых країнах, а нелем на европскім контінентї. Уж в найблизшых днях із своїм репертоаром представить ся на світовій выставі EXPO 2025 в японьскім містї Осака, де буде главным пунктом ґалапроґраму почас Народного дня Словакії.

Ансамбель свю історію почав писати у 1955-ім році як Піддуклянський український народний ансамбль, і быв оперетов і балетом втогдышнёго Українського національного театру в Пряшові. По тім, як з театру в 1990-ім роцї став русиньскый Театер Александра Духновіча, і ПУЛС змінив свою назву. Одокремив ся од театру у 2008-ім роцї.

За 70 років фунґованя одограв понад 10 тісяч домашнїх представлїнь і десяткы загранічных выступлїнь. Теперь буде Словацьку републіку ПУЛС репрезентовати в Японії в рамках выставы EXPO 2025. Як інформовало Оддїлїня комунікації ПСК, ПУЛС буде главным пунктом проґраму і выступати буде із найновішым проґрамом Скарбы.

Ансамбель буде в японьскій Осаці выступати почас трёх днїв, офіціалный Народный день Словакії є напланованый на 10-ый септембер.

ПУЛС почас своёй 70-рочной історії уж выступав у Великобрітанії, Булгарії, Данії, Франції, Голандії, бывшій Югославії, Канадї, Норвеґії, Польщі, Австрії, Нїмецьку, Швейцарії, Італії, Тунісії, США, бывшых країнах Совєтьского союзу, а по роздїлїню Чехословакії і в окремій Чесьскій републіцї.

Петро МЕДВІДЬ, ЛЕМ.фм, языкова і ґрафічна управа: АРК СР.