28. 2. 2019: Осиф КУДЗЕЙ: Новина, Келчік, Терпезливость, Начасованя

Новина

Раз вечур в селї Словінкы
чітать механік новинкы
і повідать женї: „Яно,
слухай, што ту написано.
Єден професор ракуськый
доказав, же мозоґ людьскый 
творить аж в трёх четвертинах
назвычайна рідина.‟

„Но тото?! – повідать Яна, –
я єм з того шокована.
Кедь то правдива новина –
а в мозґу є рідина,
єм присягнути готова,
же в тім твоїм є „брздова.‟

Є ту іщі рада така:
Кедь уж слухате дурака,
та покывуйте головов,
жебы вам тогды нагодов,
як він буде мудровати,
не зістав
розум стояти. 

 

Келчік

Єдного дня ближ Поломы
скупый богач Ян Лакомый,
як то уж бывать в жывотї,
выграв першу цїну в ЛОТЇ.

„Дость! – повів собі завзято,
уж мам вшыткого достаток,
уж не буду, стопроценто,
трясти ся над каждым центом,
не буду сі сановати,
а зачну кельтовати.

Пак запхав руку під гуню,
вытяг цііґаретлю туню
і зробив кельчік великый – 
стер нараз аж два швабликы.
(Зо, жебы вшыткым доказав,
же є правда, што він казав).

Лакомый муж думать підло,
што є правда, то не грїх –
він бы кажде єдно їдло
зъїв і двараз, кедь бы міг.


Терпезливость

На єдній поліклініцї,
де є і выдайня лїків,
опросив ся апатыкарь
Бартоломея Патыка:
„Почекайте, пане, гало,
проганядло вам забрало?
Кількораз сьте дома в Бродї
были по нїм на заходї?‟

„Знате, взяло ня то нараз,
а так єм там быв лем двараз,
но даяк натягло ся то
од восьмой до дванадцятой,
а о пів годины на то – 
од пів єдной до девятой.‟

Хто мать запху або гначку,
хоць мать Quartz, ці лїпшу значку,
не є паном свого часу,
бо з тоалеты мать басу.

 

Начасованя

У Пряшові на нервовім
гварить прімар пацієнтови:
„Повім вам, думав єм собі,
же сьте єднов ногов в гробі.
Нащастя мате, пан Кріза,
орґанізм як зо желїза –
ёму пожете вдячіти,
же єм вас міг вылїчити.‟

„Вдяка за інфо, пан прімар,
така новина є пріма,
з радости мі є до плачу...
Также орґанізму вдячу?
А я уж вам за румбалку
рыхтовав дати обалку!‟

Епілоґ є єднозначный:
Людём знаме быти вдячны.
На Бога ся позабуде,
хоць нам дав веце як люде.


(Уривкы з приправлёваной книжкы Хрумкы, котру у 2019 роцї хоче выдати Академія русиньской културы в Словацькій републіцї.)

Script logo