28. 3. 2025: Русинофобія за америцькы грошы

На тото стопроцентно радіо не было основане.

Адміністратіва америцького презідента Доналда Трампа нас каждый день знає несподївати. Крокы, котры оголошать, суть од такых, над котрыма мож махнути руков, аж по такы, коли собі чоловік мусить дати вопрос, ці якраз не кінчіть світ, о котрім сьме собі думали, же ту буде єднакый аж до Страшного суду.

Не будеме теперь робити аналізу ґеополітічных кроків Трампового кабінету і їх можливых дослїдків. Уж і так того было пописане доста. Но в послїднїх днях резонує у світовых медіях факт, же америцькый презідент хоче, окрем іншого, скінчіти з фінанцованём Radio Free Europe/Radio Liberty.

Натеперь Слободна Европа, котра має свою централу од 1995-го року в Празї, „выграла“, бо америцькый суд заблоковав намагы америцькой адміністратівы закінчіти фінанцованя того радія, на што грошы схвалив Конґрес.

Слободна Европа, так сьме єй знали в бывшій Чехословакії, є самособов сімбол, важный елемент боя проти комуністічного режіму. А не похыбую о тім, же і днесь, кедь высылать в 27 языках про 23 країн, має своє значіня.

Особно ся чудую, же якраз на тім хоче шпорити Вашінґтон під владов Доналда Трампа грошы. Бо таке радіо і днесь, в дакотрых припадах не менше як перед роком 1989, має змысел про будованя демокрації, але нелем то. Кедь на то посмотрити з америцького боку, є то і средство якогось впливу.

Кедь має далше пошырёвати ся русинофобія за америцькы грошы, пак дякуєме, не хочеме.

Коли Росія розшырує свої медії, якы мають різны языковы мутації, кедь видиме арабскый телевізный феномен Al Jazeera, є то так дакус властный ґол з боку Споеных штатів Америкы, кедьже Трамп хоче зрушыти і Voice of America – Голос Америкы.

Лемже з русиньского боку треба повісти окрем А і тото Б. Покля бісїдуєме о україньскій редакції высыланя, яке має назву Радіо Свобода, пак мі заставлїня фінанцованя сердце не ламле. Скорїше навспак, сердце мі ламле тото, де аж дішла Словодна Европа в україньскій верзії.

Кебы сьте перешли наприклад цїлый архів їх сайту, не найдете єдну позітівну статю односно Русинів. Радіо Свобода ниґда не збачіло нич позітівне. Наприклад ани втогды, кедь русиньскы орґанізації ясно выступили проти войны, кедь назвали аґресора. Зато бруду тота редакція вылляла на Русинів доста.

Іщі в „предвечур“ войны, в напруженій атмосфері, 23-го фебруара 2022-го року, портал опубліковав статю Олександра Гавроша о столїтнїй войнї проти Україны і „лемківскім аґентови впливу“ Дмитріёви Выслоцькім. Од втогды вышли далшы статї, котры будь пошырёвали традічны русинофобны блуды, або „шкандалы“ як кебы з дїльнї СБУ, припадно холем публіковали статї, в котрых все не забыли припомянути, же Русин – то лем стара назва Українцїв.

Но і кедь ся вернеме ку проблемі фінанцованя Слободной Европы, пак думам, же мінімално фінанцованя україньской редакції є на продуманя. Бо она давно в припадї Русинів оддалила ся цїнностям, котры тото радіо мало шырити. На тото, што роблять, стопроцентно радіо не было основане.

Мож то повісти і іншак. Кедь має далше пошырёвати ся русинофобія за америцькы грошы, пак дякуєме, не хочеме. Старчіть, же ся цїлы рокы пошырює за тоты україньскы грошы.

Петро МЕДВІДЬ. Статя была написана як коментарь „Вступне до контроли“ лемківского радія lem.fm. Языкова і ґрафічна управа: АРК СР.

Жрідло фотоґрафії: Wikipedia