28. 6. 2019: Світовый конґрес Русинів вертать ся на Словакію. Одсвяткують і День Русинів

В днях 4-го аж 7-го юла 2019-го року буде в Любовняньскых купелях проходити 15-ый Світовый конґрес Русинів. Конґрес ся вертать на Словакію по довгых роках.

1-ый Світовый конґрес Русинів проходив у 1991-ім роцї в Меджілабірцях (втогды іщі Чехословакія), другый раз орґанізовали Русины на Словакії конґрес у 2003-ім роцї в Пряшові. По 16-ох роках делеґації зо Словакії, Польщі, Україны, Мадярьска, Румунії, Чеськой републікы, Сербії, Хорватії і Северной Америкы (Канада і Споєны штаты Америкы) знова будуть засїдати в Пряшівскій области.

 

Два днї пленарных засїдань

Делеґаты конґресу, кажда членьска держава має по десять делеґатів, зачнуть сходити ся до Любовняньскых купелїв уже в четверь, 4-го юла 2019. В тот день є на вечур наплановане іщі остатнє засїданя Світовой рады Русинів, котра є выконным орґаном Світового конґресу Русинів у меджіконґресовім двойрочнім періодї.

В Світовій радї має кажда членьска держава свого представителя, на челї стоїть председа, котрый є єдночасно і председом конґресу. Председу од 14-го Світового конґресу Русинів, котрый проходив у Хорватії, выберають прямо делеґаты. Уж другый свій мандат председы теперь закінчує Штефан Лявинець із Мадярьска.

Три пленарны засїданя Світового конґресу Русинів суть напланованы на пятніцю і суботу. В пятніцю зачінать перше засїаня о 9.00 год., в рамках котрого буде і святочне одкрытя конґресу зо запрошеныма гостями. В пополїдняйшых годинах будуть проходити засїданя окремых комісій Світового конґресу Русинів.

В суботу суть на проґрамі дві пленарны засїданя. Перше од 9.00 год., друге од 14.00 год. Якраз на пополїдняйшім засїданю собі делеґаты будуть выберати новый склад Світовой рады Русинів – кажда членьска держава пропонує свого члена, і нового председу рады і Світового конґресу Русинів. За председу ся голосує прямов тайнов вольбов вшыткых участных делеґатів, причім кандідовати може веце особ. Покля в першім колі нихто не здобуде над 50 процент голосів, до другого кола поступають двоми кандідаты з найвеце голосами з першого кола. Хто здобуде векшыну голосів, стає новым председом.

В рамках пленарных засїдань членьскы державы оцїнюють свою роботу за останї два рокы од послїднёго конґресу, так само ся планує робота на період по конґресї. Рїшають ся і актуалны проблемы, на котры треба конґресу реаґовати.

 

В рамках конґресу і День Русинів Словакії

За День Русинів Словакії быв выголошеный і Світовым конґресом Русинів схваленый 12-ый юн. Тота дата є одкликанём ся на Днї руськой културы, котры проходили в Пряшівскій области в меджівойновім періодї, главно на Днї руськой културы із 1933-го року, коли быв у центрї Пряшова одкрытый Памятник Александра Духновіча.

Кедьже тот рік Русины на Словакії орґанізують Світовый конґрес Русинів, Русиньска оброда на Словеньску як головный орґанізатор вырїшыла святковати День Русинів Словакії в рамках конґресу. Святочный проґрам є приготовленый на пятніцёве пополїдне в Камюнцї.

Проґрам Дня Русинів Словакії зачне ся о 16.30 год. перед Сільскым урядом, де собі участны припомянуть 200-ту річніцю од нардожіня русиньского будителя Александра Павловіча і сторічніцю од приєднаня русиньскых теріторій до складу Чехословакії, што было офіціално потверджене 10-го септембра 1919 на Мірній конференції. Продовжовати ся буде перед містнов церьков, де ся одслужыть панахіда за вшыткых помершых членів Світового конґресу Русинів од ёго взнику у 1991-ім роцї.

За тым вже буде слїдовати процесія Русинів на амфітеатер Дубне, де буде од 18.00 год. приготовленый богатый културный проґрам. Вступ на святкованя Дня Русинів Словакії є одкрытый про каждого і вступ є вольный. На 21.00 год. є в рамках святкованя напланованый іщі концерт Іґора Куцера, котрый буде співати співанкы матери Енді Варгола – Юлії. Тота подію буде в сканзенї під градом в Старій Любовнї.

 

Конґрес підпорив і председа влады

15-ый Світовый конґрес Русинів быв підпореный Фондом на підпору културы народностных меншын. Фінанчну поміч дав так само Уряд влады Словацькой републікы з премєром Петром Пеллеґрінім і Пряшівскый самосправный край, котрогому шефує председа Мілан Маєрьскый.

Петро МЕДВІДЬ, ЛЕМ.фм

Script logo