28. 8. 2024: Святоуспеньскый одпуст одсвятковали в селї Чірч

Почас вікендун, 24-го і 25-го авґуста 2024-го року, в Ґрекокатолицькій парохії Чірч на Маріяньскій горї одбыв ся одпуст з нагоды праздника Успенія Пресвятой Богородіцї, інформовав отець Йоан Варґа про Інформачный центер Пряшівской архієпархії.

Проґрам почав у суботу процесіёв од храму, посвячінём воды при жрідлї, молитвов ружанця і великов вечурнёв із літіёв, в рамках котрой поклала ся плащаніця Пресвятой Богородіцї до гробу.

Завершінём суботняйшого дня была торжественна архієрейска літурґія, котрой головным служытельом быв Высокопреосвященый Йона Максим, пряшівскый архієпіскоп і митрополіта. По літурґії наслїдовала панахіда за отця Мірона Подгаєцького, котрый вызначно записав ся до історії той парохії, а має там і свій музей.

В недїлю головну літурґію одслужыв архімандріта Марко Дурлак, протосінкел Пряшівской архієпархії, кедьже кір Йона быв у тот день на одпустї в Довгім Кылчові, де ся святковала сторочніця храму.

Одпусты в селї Чірч суть повязаны із дїями в роцї 1898, о котрых у парохіалній кроніцї отець Мірон Подгаєцькый написав:

„Двом чірчскым дївкам, котры пасли коровы під Углисками, появив ся якыйсь старець, котрый їм дав вопрос, ці бы не хотїли, жебы ту приходило велё людей на одпусты. По згодї дївок старець запхав паліцю до земли і на тім місцї вытріскло жрідло воды із лічівыма силами. Старець жадав, жебы там была збудована каплічка.“

Коли дївчата в селї повіли, што ся їм стало, стрїтили ся із непорозумінём. Од того часу в селї были погромы, котры завершыли ся великыма зливами. Аж по них село вырїшыло збудовати на місцї зъявлїня каплічку, котру присвятили Успенію Пресвятой Богородіцї. Люде почали там приходити і одбыло ся там веце чудесных выздоровлїнь. Пак там люде збудовали іщі єдну каплічку.

У 1973-ім роцї была до інтерьєру каплічкы наіншталована ікона од майстра Крижановского, і каплічку втогды наново высвятив пряшівскый помічный єпіскоп, священомученик Василь Гопко.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Лукаш Колцун.