28. 9. 2018: Стріча представителїв меншын із директорами народностных музеїв

26-го септембра 2018-го року проходила в братїславскім владнім готелї „Bôrik‟ стрїча председы Выбору про народностны меншыны Ласла Буковского (третїй злїва) із директорами народностных музеїв.

Участный стрїчі, на котру скликаня Буковского повірили членове народностного выбору, быв так само ґенереланый директор Словацького народного музею (СНМ), під котрый народностны музеї належать, представитель Міністерства културы Словацькой републікы, котре є зряджователём СНМ і представителї народностных меншын, котры мають музеї. За русиньску народностну меншыну брав участь Ян Липиньскый, председа Округлого стола Русинів Словеньска, котрый є єдночасно членом-заступцём Выбору про народностны меншыны і етнічны ґрупы. Участна была і директора СНМ – Музею русиньской културы в Пряшові Ольґа Ґлосікова.

 

Выслїдком суть рекомендації

На стрїчі были презентованы інформації о розвитку і актуалнім ставі окремых народностных музеїв, як і о резултатах і позітівах їх діятельства, інформує офіціалный сайт уповномоченого про народностны меншыны і етнічны ґрупы. Єдночасно были ідентіфікованы і дакотры проблемовы области і сформулованы шпеціфічны і сполочны рекомендації.

„Резултатами стрЇчі є дакілько рекомендацій про злЇпшіня ставу народностного музейницьтва, главно потреба підниманя фінанчных средств про музеї народностных меншын, і на одборну, і аквізічну діяльство,“ пише сайт уповномоченого.

В рамках діскусії дішло ся до того, же є потрібна підпора одборного діятельства і посередництвом посилнїня персоналного в народностных музеях. Музеї бы мали в будучности сполупрацовати з орґанізаціями народностных меншын. Участны згодли ся і на тім, же треба забезпечіти реґуларны стрїчі односно проблематікы народностных музеїв в подобнім складї, як тотраз, і же є потребне обновити діятельство Комісії про музейницьку документацію култур етнічных міноріт.

Подля выслїдків стрїчі бы ся мав знова реалізовати і успішный сполочный проєкт народностных музеїв під назвов Музеї і етнікы, котрый мав выняткове значіня про маёріту, з цїлём підпоры усвідомлїня собі народностной розмаїтости на Словакії. Акцент быв даный і на то, жебы хосновав ся язык меншын у рамках діяльства народностных музеїв, з цїлём пропаґації языковой розмаїтости Словакії, а то і в области сприступнёваня общіх інформацій про людей в языку народностной меншыны.

 

8 народностных музеїв

Словацькый народный музей справує довєдна 45 музеїв або обєктів, в котрых находять ся історічны і умелецькы експозіції. В тім чіслї є і вісем народностных музеїв. Свій музей мають на Словакії Хорваты, карпатьскы Нїмцї, Мадяре, Чехы, Русины, Ромове, Українцї і Жыды. Далшых пять народностных меншын, котры суть узнаны на Словакії, свій музей не мать.

Словацькый народный музей – Музей русиньской културы в Пряшові выникнув 1-го януара 2007-го року. У функції директоркы є од выникнутя Ольґа Ґлосікова. Музей быв на зачатку свого діятельства в арендованых просторах. 31-го децембра 2013-го року была святочно одкрыта часть будовы музею, котра вже є маєтком інштітуції.

Петро МЕДВІДЬ, жрідло: лем.фм