29. 3. 2018: Кінчіть ся проєкт Стежков ікон

У марцу 2018 в Гуменнім кінчіть словацька часть мікропроєкту під назвов Стежков ікон зо Санока до Гуменного, котрый є співфінанцованый Европскым фондом реґіоналного розвитку посередницьтвом Проґраму черезгранічной сполупраці.

 

Як інформовала словацькый денник Korzár Марія Мічкова із пресового оддїлїня міста Гуменне, в рамках мікропроєкту реалізовало ся вецеро актівностей. Меджі нима быв і пленер творчости народного уменя з тематіков ікон, на котрім брали участь авторы зо Словакії і Польщі.

 

Далшов актівностёв было вызначіня біціґлёвой стежкы – Стежкы ікон. Тота стежка зачінать в центрї міста Гуменне, коло ренесанчного замку, іде через села напрямом на Меджілабірцї і кінчіть на граніцї з Польщов. Цілково має стежка довжку понад 53 кілометрів і є означена латиньсков буквов „C“.

В Гуменнім у рамках проєкту змодернізовали і турістічный центер, котрый є в будинку желізнічной штації. Так само выдруковали ся інформачно-пропаґачны матеріалы, як турістічный проводник, публікація о інтересных місцях в пригранічнім реґіонї ці мапа з вызначенов біціґлёвов стежков Гуменне – Меджілабірцї – Полата – державна граніця як Маґістрала ікон.

Мініпроєкт є співфінанцованый із Европского фонду реґіоналного розвитку, і то 85-ма процентами, десять процент ішло із державного розрахунку і решту дофінанцовало місто Гуменне. Цілкова сума фінанцій, котры ішли на проєкт є 92 тісяч евр.

 

Стежков ікон зо Саноку до Гуменного є проєкт реалізованый двома партнерами – Саноком і Гуменным. Цілём проєкту є підняти уровень тырвало утримательного хоснованя културной і природной дїдовизны турістами і жытелями. Веце о проєкті мож дочітати ся на його офіціалнім сайтї, котрый має польску і словацьку верзію.

 

П. М.

Script logo