29. 3. 2019: Елена ХОМОВА: Мати так крыла орла, Шістьдесят років, Вітай, ярь (стихы)

Мати так крыла орла...

Як бы я могла вернути час,
мати так крыла орла
облетїты давны молодости місця,
товаришкы радо стрїтити, вєдно
в лавцї з нима посидїти в школї.
Прийти вечур на музику
з хлопцями танцёвати в колї. 
За Скалов над селом палити в огнї
в маґічну ніч на Святого Яна.
На загородї з граблями
розбывати покосы, там сушыти сїно
по мокрой раннїй росї.
Освіжати ся зимнов водічков
з быстрого недалекого ярку,
на розквітнутїм убочі
назбирати букету пахнячіх фіялок...
як бы я могла вернути час...

 

Шістьдесят років

Было то як вчера, прешли нам рокы,
претекло много воды, днеська славиме шістьдесят років.

Поздвигнийме чашу моку, выпийме ю до дна,
бы сьме твоє народжіня ославлёвали іщі до ста.

На здравя, на щастя, на успіх, на згоду,
на любов, на радость, на добру в старобі погоду. 

 

Вітай, ярь

Вітай нам ярь,
ты пришла в наш край,
стромы пукають
листочкы пущають
далеко в лїсї,
першый раз зозуля кукать.

Доджік покропив
по зимі поля,
зелена травічка
росте довкола.

Земля нас кличе
подьте сїяти,
нову уроду до мене дати.
Зубате сонце 
выйде споза хмар,
зогрїє личка
дасть тепло нам.

Script logo