29. 3. 2026: То не є лем театер, то єден із фундаменталных стовпів русиньской ідентіты

24-го новембра 1945 на основі рїшіня „Української народної ради Пряшівщіни‟ выникнув в Пряшові „Український національний театер‟. Уж 2-го марца 1946 театер одпремєровав першу пєсу. Тот театер быв переменованый на Театер Александра Духновіча в Пряшові , бо зачав грати пєсы в русиньскім языку. Є то єдиный професіоналный русиньскый театер на світї і теперь святкує 80 років, 80 сезон. Театер зограв свою немалу роль про ідентіфікацію Русинів на Словакії, але вплинув і на розвиток русиньского возродного руху Русинів главно в карпатьскім ареалї.