29. 4. 2026: Русины будуть святковати в Мішколцї

Вседержавне русиньске самосправованя в Мадярьску і тот рік, як уж стало звыком, в місяцї май орґанізує Русиньске народне свято, яке є все скапчане із передаванём Премії імени Антонія Годинкы. Каждый рік тота подія проходить в іншім містї.

Тот рік орґанізаторы Русиньского націоналного свята выбрали собі про свою подїю центер Боршодьско-абовско-земпліньской жупы – місто Мішколц. Русины ся на торжество зыйдуть в суботу, 9-го мая 2026-го року, і подїя буде проходити в просторах Мішколцьской ґрекокатолицькой основной школы.

В рамках културного проґраму будуть участны годны відїти выступлїня дїтей із недалекого русиньского села Мучонь, а так само і выступлїня Мішколцьского русиньского танечного колектіву. В рамках проґраму, як уж было спомянуто, одбуде ся і передаваня Премії імени Антонія Годинкы од Вседержавного русиньского самосправованя.

Выбране і скорочене зо статї Петра МЕДВІДЯ, ЛЕМ.фм. Ґрафічна і языкова управа: АРК в СР.