29. 6. 2016: Влада бы о новім фінанцованю меншын мала їднати до кінця рока

17-го юна 2016 в просторах Міністерства културы Словацькой републікы проходила перша стрїча робочой ґрупы зрядженой на выроблїня єдной із ключовых пріоріт владной партії Most-Híd закона о фінанцованю народностных меншын.

На владї до кінця рока

Цілём закона, як інформує офіціалный сайт партії, є забеспечіня сістематічной, достойной і транспарентной підпоры културных і умелецькых актівностей вшыткых народностных меншын в Словацькій републіцї і пропорціолна компензація фінанчных средств міджі меншынами. Партія Most-Híd при вступі до влады жадала вытворїня фонду на фінанцованя културы народностных меншын і брала то за єдну із своїх пріоріт, котру наконець і протисла до Проґрамового выголошіня влады.

Ласло Буковскі, уповномоченый влады Словацькой републікы про народностны меншыны, быв зволеный за председу робочой ґрупы. Абел Равас, уповномоченый про ромскы комуніты, буде так само членом робочой ґрупы. Ґрупа доїднала ся на основных рамках приготовлёваня закона, котрый має быти на їднаня влады Словацькой републікы передложеный до кінця того рока.

Яке бы мало быти нове фінанцованя

Буковскі бере за єден із головных цїлїв у своїй функції схвалїня нового закона о фондї на підпору културы народностных меншын. Обіцять собі од того стабілізацію і одполітізованя підпоры народностной културы на Словакії. Бісїдовав о тім уж при своїм зволїню до функції в апрілю 2016-го року.

У фондї бы мало быти веце грошей (обіцяно є раз тілько, як тому было того року), обєм грошей бы мав быти стабілный, не мав бы ся міняти каждый рік, як тому є теперь, подля схваленого державного розрахунку на даный рік, і меншыны самы бы мали рїшыти, як тоты грошы роздїлити. У вопросї найвекшого нароснутя обєму грошей, кібы ся закон прияв так, як го хотїла уж довшый час просадити партія Most-Híd, поміг бы головно Мадярям.

Заведжінём фонду, подля пропозіції партії, бы перестав платити модел перерозділёваня грошей міджі окремы меншыны, котрый просадив Округлый стіл Русинів Словеньска. Русины бы в рамках нового фонду дістали на свої културны актівности реално веце грошей, але то лем завдякы векшому обєму грошей вообще выдїленых на културу меншын. В рамках перецентуалного перероздїлёваня цїлковой сумы на меншыны, бы на тім были гірше.

П. М.

Script logo