29. 8. 2017: Вказала ся книжка про Дюру Папгаргая
Інституция за Kультуру Войводиньскых Русинів довєдна з Музейом Театру Войводины напечатали публикацию, котра посвячена єст єдному з найвыдатнійшых русиньскых поетів, писменників та драматурґів – Дюрі Папгаргайови. Про плідну карєру – і як творця літературы, і автора драматичных текстів – пише Ірина Гарди Ковачевич.
Дюра Папгаргай жыл в роках 1936-2008. Был писательом, новинарьом, театральным діячом, ініциятором культурных подій серед Русинів в Войводині. Основну школу та ґімназию скінчыл в рідным селі – в Рускым Керестурі. Середню освіту здобыл в Новым Саді, там тіж студиювал літературу на Філософічным Выділі. В своій професийній роботі працувал як учытель во Вербасі та Рускым Керестурі. Был редактором ґазеты «Рускє Слово» та через 30 років шефредактором ґазеты «Шветлосц» – часопису про літературу, культуру.
Публикувати поезию і прозу зачал іщы в студентскых роках. Серед його творів вымінити мож збіркы поезиі Ту такой при шерцу, Олово, черешньов квет, Тровач снох, поема Чуваре хмарох, збірка поезиі для діти Нє дам свойо роки и квит ци Путованє на юг. Прозу найліпше репрезентуют книжкы: роман для діти Конєц швета та збірка оповідань Вина. Пєсы його авторства дотепер реґулярні выставляны сут через ріжны театры. Сам через рокы был режысером Русиньского Народного Театру «Дядя» в Новым Саді. Єст автором Д. Папгаргай чысленных статій літературно-критичного та публицистичного характеру, тіж автором шкільных підручників. Його остатньом драматичном роботом была русиньска трилоґія Образи на скори,посвячена істориі рідного народу, почыняючы од його населіня в Кересетурі в 1740. роках.
Был Дюра Папгаргай за свою роботу вельократні нагороджуваний, м.ін. престіжовом в Югославіі премійом ім. Вука Караджіча за осягніня в обшыри літературы ци премійом ім. Алескандра Духновича за найліпший твір русиньской літературы. Од 2002 рока в Новым Саді орґанізуваний єст Русиньскій Фестіваль Малых Сценічных Форм Дюра Папгаргай.
(Публікуєме в оріґіналї – лемківскім варіантї русиньского языка.)
