29. 9. 2018: 21. Літерацка Осін в Креници і з лемківском поезийом

Стоваришыня Польскых Писателів та Ева і Станіслав Єжы Кулісь орґанізовали велику ювілейну Поетицку Ґалю п.н. «Крениця Поезиі», орґанізувану в рамках 21. Літерацкой Осени. Ґаля прошла в пятницю, 28 вересня/септембра 2018 р. в Бальовій Сали Старого Здройового Дому в Креници.

Своі вершы під гаслом «Кликаня до натуры» прочытали знаны краківскы поеты, м.ін. Ельжбєта Зехентер-Сплавіньска, Юзеф Баран, Адам Зємянін і Міхал Заблоцкій, лавреаты поетицкого конкурсу «Наша мала Польща», а тіж запрошены гості. Перший раз вчас Літерацкой Осени был прочытаний і лемківскій верш. Того рока на Поетицку Ґалю был запрошений і найвыдатнійший сучасний лемківскій поета, писатель та артиста, Петро Трохановскій (Мурянка).

Петро Мурянка, знаний і з власной поезиі, і з перекладів чужой на свій рідний язык, од років причынят ся до пошырюваня чысла любителів лемківской творчости, лемківского языка. Недолгій час тому вышла нова книжка автора п.н. «Польска поезия», збераюча знаны польскы вершы, од старопольской до сучасной поезиі, переведены на лемківскій язык. То наступний великій дар для лемківской літературы. Уж давно за переклад поезиі Юлиюша Словацкого поету доцінил знавця та бадач лемківской літературы, Збіґнєв Сятковскій. Як пише во вступным слові о тых перекладах проф. Генрик Фонтаньскій: «Переведіня «Отця зачумленых» вымагало величезной працы, але єй результат то неоцінений подарунок за труд тлумача, котрий вказал тым, што лемківскым языком образы і емоциі завершены в ориґиналі мож оддати не меньше суґестивні.» Спомнену книжку мож byлo купити вчас «Крениці Поезиі».

Ґалю вели Ельжбєта Войнаровска і Міхал Заблоцкій. Музычні ґалю прикрасили – своім співом Івона Карч, а акомпаніювал Пьотр Войнаровскій.

Наталія КЛИНКОВСКА, жрідло: лем.фм