29. 9. 2018: В Русиньскій ґрекокатолицькій єпархії в Пармі буде Клокочівска Богородіця

  • Почас навщівы катедралного собору в Кошыцях віруючі вєдно із своїм єпіскопом, владыком Міланом (Хаутуром) (справа) помолили ся Молебен ку Пресвятій Богородіцї. На кінцю молитвы владыка Мілан (Хаутур) подаровав копію іконы Клокочівской Пресвятой Богородіцї єпархії в Пармі, яку перевзяв єй єпіскоп, владыка Мілан (Лах).

    Почас навщівы катедралного собору в Кошыцях віруючі вєдно із своїм єпіскопом, владыком Міланом (Хаутуром) (справа) помолили ся Молебен ку Пресвятій Богородіцї. На кінцю молитвы владыка Мілан (Хаутур) подаровав копію іконы Клокочівской Пресвятой Богородіцї єпархії в Пармі, яку перевзяв єй єпіскоп, владыка Мілан (Лах).

Од 16-го до 28-го септембра 2018-го року проходить паломництво вірників Русиньской ґрекокатолицькой єпархії в Пармі під назвов Із Маріяповчі до Маріяповчі – паломництво до середнёй Европы 2018.

Вірюучі, котрых допроводить їх єпарха, владыка Мілан (Лах), почас тых днїв наплановали собі навщівити вызначны місця русиньской церькви в Европі. Значіть місця в єпархіях, котры выникли із матери – Мукачівской ґрекокатолицькой єпархії, яка доднесь, єднако як єпархія в Пармі, є Ватіканом записана як церьков русиньска.

 

Мадярьско – Словакія – Україна

Путници зо своїм владыком навщівили такы міста як Гайдудороґ, Ніредьгаза, Мішколць, суботу, 22-го септембра 2018 брали участь на ославах 200-го юбілею еріґованя Пряшівской єпархії булов Relata Semper в Лютинї. В неділю продовжовали свою путь, кедь навщівили Літманову ці Катедралный собор св. Іоана Хрестителя в Пряшові.

В понеділёк, окрем іншого, завітали віруючі із Споєных штатів Америкы до Катедралного собору Рождества Пресвятой Богородіцї в Кошыцях, потім мали свій проґрам в Ужгородї і Мукачові. Перед їх навернутём домів іщі навщівили маріяньске путницьке місце в мадярьскій Маріяповчі.

 

Знак єдности русиньской церькви

Почас своёй понедільковой навщівы катедралного собору в Кошыцях віруючі вєдно із своїм владыком Міланом (Хаутуром), кошыцькым єпархом, помолили ся Молебен ку Пресвятій Богородіцї. На кінцю молитвы з кошыцькым єпіскопом владыка Мілан подаровав копію іконы Клокочівской Пресвятой Богородіцї єпархії в Пармі. Ікону передав єй єпіскопови Міланови (Лахови).

Як інформовав Пресцентер Кошыцькой єпархії (Tlačové stredisko Košickej eparchie), ікона Колокочівской Богородіцї буде дана до Церькви св. Марії в парохії Марблгед в штатї Огайо. Ікона має быти подля пресцентру „знаком єдности і звязку Русиньской ґрекокатолицькой церькви на обидвох контінентах“.

„Най хоронить вашы родины в Америцї так, як хоронить нашы на Словакії,“ цітовав пресцентер кошыцького єпархіялного єпіскопа Мілана (Хаутура).

Петро МЕДВІДЬ, жрідло: лем.фм, фотоґрафія: Давід КОВАЧ.

Script logo