29. 9. 2025: В Хорватії одбыв ся фестівал Кед голубица лєцела. Засїдала і СРР

Почас вікенду, 26-го і 27-го септембра 2025-го року, в Петровях одбыв ся вже 15-ый рочник фестівалу Кед голубица лєцела, котрого головным орґанізатором было Дружство Руснак, членьска орґанізація Світового конґресу Русинів.

З той нагоды одбыло ся в Старых Янковцях в суботу, 27-го септембра, і Друге засїданя Світовой рады Русинів, выконного орґану Світового конґресу Русинів у меджіконґресовім періодї. Своє засїданя в суботу мала і Світова рада русиньской молодежи.

Богатый проґрам

Як інформовав про аґентуру Рутенпрес Іван Лікар, културный фестівал почав уж в пятніцю проґрамом дїтячой філклорной творчости під назвов Нашо искри. По нїм наслїдовав Меджінародный філмовый фестівал Русинів, на котрім быв премєрованый і куртометражный документарный філм Най ше не забудзе.

В суботу пополудни про участників была приготовлена выстава фотоґрафій під назвов Лєци, леци голубица, і пак наслїдовав ґалапроґрам фестівалу Кед голубица лєцела в Домі културы в Петровцях. Тот рік собі почас ґалапроґраму припомянули і 10 років навчаня русиньского языка і културы на Основній школї Антуна Бауера у Вуковарї, котре было ініціоване Дружством Руснак.

Засїдала СРР

В суботу дополудни одбыло ся Друге засїданя Світовой рады Русинів (СРР), на котрім взяли участь председа Штефан Лявинець із Мадярьска, Мартін Караш із Словакії, Ґеорґій Фірцак із Румунії, Михайло Фейса із Сербії, Ян Чопік із Чеськой републікы, Микола Бобинець із Україны, і домашній Мійо Шайтош.

СРР на своїм засїданю, окрем іншого, оцїнила проходжіня 18-го Світового конґресу Русинів, якый одбыв ся в юни 2025-го року в Букурештї, а так само были обговорены окремы пункты Резолуції, котра на конґресї была прията, але і далшы темы

Засїданя мала і молодеж

В суботу одбыло ся в Старых Янковцях і Третє засїданя Світовой рады русиньской молодежи (СРРМ).

Участь взяли председателька СРРМ Светлана Бойчук із Румунії, Александер Грічко із Словакії, Срдян Ґовля із Сербії, Матей Бурчак із Хорватії і Вероніка Словікова із Чеськой републікы, котра заступалиа членку рады Яну Томкову.

На засїданю бісїдовало ся о потребі змінити Штатут Світового форуму русиньской молодежи, кедьже од ёго реґістрації у 2004-ім роцї перешло много часу. Было добісїдовано, же ся зробить робоча ґрупа, котра Штатут приготовить.

Обговорили ся і далшы пункты, меджі котрыма быв замір зорґанізовати в слїдуючім роцї в Малім Липнику на Словакії 2-ый Інтернаціоналный табор Світового форуму русиньской молодежи, робота до далшого засїданя, а было выбрате лоґо форуму, котрого автором є Александер Грічко.

Петро МЕДВІДЬ, ЛЕМ.фм, языкова і ґрафічна управа: АРК СР.