3. 12. 2021: Елена ХОМОВА-ГРІНЁВА: Будьте мі потїхов, Позберам до зайды, Летьте світом віршы (Стишкы)

Елена Хомова-Грінёва

Будьте мі потїхов

 

Потїхов будьте мі віршы,

глухов верьбов в жывотї,

камаратков помочі і рады,

гладячіма руками,

якы подають мі воды,

палаючов іскерков огня

розпаленым радостёв сердце.

Душу обмыйте любовёв,

тугов, надіёв в хворотї,

словами вдякы в старобі.

 

Позберам до зайды

 

До зайды позберам споминкы,

до старобы од молодых лїт.

Звязана трочками на хырбетї

понесу жывотом дале їх.

Ногы спутаны роками

тягають тїло до землї,

зроблены рукы міцно тримають

своє богатство на плечі.

 

 

Летьте світом віршы

 

Летьте мої віршы, летьте,

як орлы на крылах,

люде далеко в чуджінї

чекають вас,

то білы голубкы

по землї ходять,

вылетять на стрїху,

боять ся громів,

рахоту петард.

Стулять ся до купкы,

очі смотрячі до темнот,

выстрашены тїла ся трясуть.

Такой прилетїли бы назад

в покійный свій родный край,

погласкайте віршы

мілым словом їх по пірях.

 

(З приправлёваной книжкы – Під скалов росте свербогуза.)