3. 3. 2025: В Румунії засїдала Світова рада Русинів. Конґрес першыраз ся одбуде в парламентї
В суботу, 1-го марца 2025-го року, в селі Пожоґа, в Румунії, одбыло ся 5-те меджіконґресове засїданя Світовой рады Русинів (СРР). Засїданя было повязане із святкованём півокруглой рочніцї.
Членьска орґанізація Світового конґресу Русинів – Културне общество Русинів Румунії припомянуло собі 25 років од свого основаня. Як інформовав председа Світового конґресу Русинів Штефан Лявинець, на святкованю, котре проходило перед засїданём, взяли участь і представителї державных властей, участный быв і депутат румуньского парламенту за Русинів Юліус Маріян Фірцак, як і представителї містной і жупной самосправы.
Тото святкованя было скапчане і з празднованём Дня Русинів Румунії, котрый є Світовым конґресом Русинів схваленый на 3-го марца.
Світова рада Русинів, котра мала своє засїданя по святочній части проґраму, обговорила дакілько пунктів, меджі котрыма быв і термін XVIII. Світового конґресу Русинів. На засїданю были участны вшыткы члены СРР, окрем члена за Северну Америку.
Конґрес одбуде ся в юни в румуньскім парламентї
На попереднїм конґресї, котрый проходив у 2023-ім роцї в Новім Садї, в Сербії, было делеґатами схвалене, же XVIII. Світовый конґрес Русинів одбуде ся в столиці Румунії – Букурештї, в просторах румуньского парламенту.
„Обговорили сьме протокол зорґанізованя конґресу, спискы делеґацій, честованых гостів, округлы рочніцї, котры собі на конґресї хочеме припомянути,“ інформовав председа СРР Штефан Лявинець.
„Дуже важным є, же першый раз Світовый конґрес Русинів одбуде ся в просторах парламенту. На засїданю Світовой рады Русинів сьме потвердили термін конґресу. Тот буде проходити в днях 12-го аж 15-го юна 2025-го року,“ інформовав далше Лявинець.
„Знаме, же політічна сітуація в Румунії є доста зла, складна. Є там політічный бой, знаме, яка сітуація є коло презідентьскых волеб. Сітуація є напружена. Але пан Ґеорґій Фірцак (член СРР за Румунію, позн. ред.) нас запевнив у тім, же термін, уквартелёваня і просторы в парламентї суть забезпечены,“ сконштатовав председа Світового рады Русинів з тым, же тото потвердили і представителї румуньского парламенту, котры пришли на святкованя юбілею Културного общества Русинів Румунії.
О сполупраці буде ся рїшыти перед конґресом
В рамках проґраму засїданя СРР в Румунії быв і пункт, котрый дотуляв ся жадости схвалити Декларацію о сполупраці із Світовым конґресом Русинів од Саскачеваньской асоціації русиньской културы (Канада), а так само од Русиньского літературно-културного общества (Підкарпатя).
Як інформовав Штефан Лявинець, на засїданю Світовой рады Русинів через різны причіны наконець доїднало ся, же о тім пунктї буде ся вырїшовати на остатнїм засїданю СРР, котре одбуде ся день перед початком XVIII. Світового конґресу Русинів.
Рада рїшыла і нагороды
На засїданю обговорили ся і крітерії про удїлёваня двох нагород. Тов першов є Премія імени Василя Турока-Гетеша за вызначны резултаты досягнуты в рамках розвитку русиньской културы у вшыткых їй аспектах ці за вынятковы успіхы їй презентованя. Премія може быти удїлена так орґанізаціям, як і особам.
Членьскы орґанізації на тоту премію можуть приголосити своїх номінантів до 20-го апріля 2025, а нагорода буде передавати ся почас засїданя XVIII. Світового конґресу Руснів.
Обговорены были і крітерії Націоналной премії за русиньске уменя імени Івана Манайла Pro Arte Ruthenorum, яку удїлює Світовый конґрес Русинів і Русиньске націоналне самосправованя міста Вац в Мадярьску. Термін на поданя номінацій є так само до 20-го апріля, і премія буде святочно вручена лавреатови почас засїданя конґресу.
Петро МЕДВІДЬ, ЛЕМ.фм, языкова і ґрафічна управа: АРК СР.
