3. 3. 2025: ПСК оправив шкоды по землетрясїню в двох інштітуціях вдяка Підкарпатьскому воєводству
Роботы на Вігорлатьскім музею в Гуменнім і Піддукляньскім освітнім центрї у Свіднику, котры были пошкоджены почас землетрясїня у 2023-ім роцї, суть закінчены.
Як інфомровав Пряшівскый самосправный край (ПСК), зреконштруованы просторы собі в пятніцю, 28-го фебруара 2025-го року, посмотрили представителї краю і польского партнера – Підкарпатьского воєводства, котре на тоты роботы дало фінанчну поміч в сумі веце як 138 тісяч евр.
Сімбол проглублїня нашых односин
„Мали сьме частковы інформації, же в Пряшівскім краю было землетрясїня, але не знали сьме о ёго великости, ани не мали зданя, же ішло о великы страты і шкоды на маєтку,“ повів у зреконштруованых просторах Вігорлатьского музея в Гуменнім маршалок Підкарпатьского воєводства Владислав Ортыл (на фотцї злїва).
„Влизшы детайлы дізнав єм ся аж по стрїчі з председом ПСК, а на основі тых фактів, у Підкарпатьскім воєводстві прияли сьме барз скоре рїшіня помочі нашому партнерьскому реґіону. Іде ту властно о сполупрацу краю і нашого воєводства, і мі тота солідарность барз любить ся,“ продовжовав маршалок.
За ёго словами обидва тоты реґіоны капчать довгодоба сполупраца, наприклад в области драговой інфраштруктуры, турістічно руху, але тото было першый раз, коли воєводство краю помогло такым способом.
„Тото ґесто спринимаме як сімбол проглублїня і потверджіня нашых односин,“ закінчів Владислав Ортыл.
Найвекше пошкоджіня од 1947-го року
Пошкоджіня ренесанчного каштеля в Гуменнім, в котрім має свої просторы музей, были што до природных катастроф найгіршы од 1947-го року, коли із доднесь непоясненых причін згорїла стрїха той народной културной памяткы.
Землетрясіня теперь запричінило великы шкоды на будові – пуклины на стїнах в 35-ёх містностях, пуклины на фасадї ітд. Реконштрукція за веце як 133 тісяч евр обсяговала ставебны роботы, умелецько-ремеселны роботы і рештавраторьскы роботы.
Далшых понад 46 тісяч евр музей дав посередництвом розрахунку ПСК на інжінірьско-ґеолоґічны баданя, оцїнкы статікы, выпрацованя проєктовой документації, як і далшы з тым повязаны дїла.
Землетрясїня лем рік по реконштрукції
„Лем рік по великій і складній реконштруцкії каштеля Пряшівскый край засягло землетрясїня, котре пошкодило велику часть будовы,“ повів у пятніцю председа ПСК Мілан Маєрьскый (на фотцї справа).
Як далше інформовав жупан Маєрьскый, обновлены просторы мусив край втогды заперти і зохабити на оцїнку статікам.
„Нащастя, за помочі нашого сусїда – Підкарпатьского воєводства, подарило ся нам тот културный пункт в куртім часї обновити так, жебы знова быв безпечный про навщівників. Барз оцїнюю тоту поміч, котра єдночасно потвердила стару познату пословіцю – в нужді знаш приятеля. І Підкарпатьске воєводство є такым приятелём,“ повів далше жупан.
Будова пошкоджена і у Свіднику
Піддукляньскый освітній центер у Свіднику мав по землетрясїню пуклины на стїнах, головно в части, де є споїня меджі старов і новов будовов. Пошкоджены были і ґарадічі ці далшы части інтерьєру. Реконштрукція подарила ся за майже 49 тісяч евр вдяка черезгранічній помочі і фінанціям пряшівской жупы.
Підкарпатьске воєводство дало Пряшівскому самосправному краю фінанції в сумі понад 600 тісяч злотых, што є веце як 138 тісяч евр. Перед тым быв підписаный Договор о фінанчній помочі в повязаню із природнов катастрофов, котрый підписали партнеры іщі в юни 2024-го року.
Петро МЕДВІДЬ, ЛЕМ.фм, языкова і ґрафічна управа: АРК СР
