3. 4. 2017: Вышла нова книжка Миколая Ксеняка

31. марця 2017 ся нам дістала до рук нововыдана книжка-зборник Резонанції на книжкы і події (Пряшів: Академіа русиньской културы в СР, 2017, 154 стор.) писателя Миколая Ксеняка. Окремы части говорять уж своёв назвов, о чім є їх обсяг. Также нова книжка (12. авторова выдана публікація в русиньскім языку в роках 1994 до 2017) має такы части: МАТИ В ТВОРАХ МАРІЇ МАЛЬЦОВСКОЙ, Рефлексії на «ДОМ БЕЗ СВІТЛА»Валерія Купкы, Спонтанны думкы на «МОЇ НЕЗАБУДКЫ» Юрка Харитуна, Ехо чітателя о книжцї «З РУСИНЬСКОГО СЕРДЦЯ» Миколая Коневала, Привітаня книжкы «З РУСИНЬСКОГО СЕРЕДЦЯ. МОЇ СТИШКЫ (2)» Миколая Коневала, Думкы іншпірованы книжков «БУРЇ НАД БЕСКИДАМИ» Штефана Смолея, ВЫЗНАНЯ історікови, писателёви і педаґоґови Гавриілови БЕСКИДОВИ, Язвы, лїтокругы шепнуты Штефаном СУХЫМ, ЧОМ НЕ СЬМЕ ГОРДЫ? і ПОЗДРАВЛЇНЯ. Послїдня часть – ПОЗДРАВЛЇНЯ – то є одданя чести 25-річному діятельству першых пореволучных русиньскых НАРОДНЫХ НОВИНОК.

Книжка є рознорода: окрем двох частей у прозї, цїла є у поетічных віршах. Зборник є вообще інтересный і многы чітателї рады сягнуть по нїм, жебы сі в часї вольна прочітали думкы М. Ксеняка, котры выкликали у нёго окремы русиньскы книжкы, творчость М. Мальцовской і Ш. Сухого, діятельство Г. Бескида і юбілей Народных новинок. Прочітайте, може, з многым будете согласны, але то значіть, же сьте перед тым прочітали спомянуты книжкы, познате літературну творчость М. Мальцовской і Ш. Сухого, културно-народностне діятельство Г. Бескида і познате роль Народных новинок.

На конець треба спомянути, же нова книжка М. Ксеняка зачатком рока 2017 не была выбрана, жебы выдаватель дістав фінанчну дотацію од штату на єй приправу і выданя „одборнов комісіов‟ про русиньску народностну меншыну уповномоченого про народностны меншыны Уряду влады СР. Але автор ся не успокоїв зодборным ‟ вердіктом спомянутой комісії, і за властны пінязї выдав неперек тому тоту книжку, бо не хотїв, жебы ёго написаны думкы зістали даґде в шуфлядцї, а не дістали ся ку русиньскому чітетелёви.

-аз-