3. 4. 2017: Прийдите, чада…
Же каждый, хто буде із Русинів говорити о правах Русинів на Україні і несправедливостях, котры ся односно них діють, є такой означеный за руку Москвы, і вопросом про україньскы медії і Києв зіставать лем то, кілько за то рублів місячно дістане із Кремля, на то сьме собі вже привыкли. Але што зроблять із чоловіком, котрый до такой шаблоны нияк раз не пасує?
Недавно на україньскім порталї „Католицький Оглядач“ вышло інтервю із Анталом Майнеком. Было то із нагоды того, же Майнек є точно пятьнадцять років єпіскопом Мукачівской римокатолицькой дієцезы, но уж од 1997-го року быв апостольскым адміністратором Закарпатя. Родак із Будапешту, Мадярь. Кібы „путь Господня“ была про нёго выбрата інша, нияк не мав бы із теріторіов Підкарпатя якбач нич довєдна. Значіть, ани з Русинами. Жебы римокатолицькый єпіскоп мав мати даякы теплы односины з Москвов, жебы мав робити руку Москвы, є так само на граніцї sci-fi, кідьже каждый, хто холем дакус має знаня о тій проблематіцї, знать і то, якы проблемы мають римокатолицькы єпіскопы і віруючі в Росії, якы суть односины православных і властей ку ним, і же перевязаня Православной церькви і російскых властей в тій области робить своє. Курто: ружове то там не мають.
Но якраз тот чоловік, із посады мукачівского єпіскопа, в інтервю повів тото, на што, нажаль, уж многы з духовенства так православной як і ґрекокатолицькой церькви капітуловали. Хоць єдна і друга церькви суть на Підкарпатю завдякы Русинам, покля Майнекова церьков там має іншы коріня.
Антал Майнек в інтервю бісїдує о тім, же аж до моменту пошырёваня націоналістічной, шовіністічной політікы в реґіоні Підкарпатя, мірно коло себе жыли, і теперь зохаблям вырахованя народностей так, як їх вытолковав єпіскоп: Русины, Мадяры, Жыды, Нїмцї… Українцїв не споминать. Єпіскоп так само бісїдує о тім, же то Русины творили в тім часї головно Ґрекокатолицьку церьков, котра была найвекша в тім реґіонї, но по ІІ. світовій войнї примушали їх переходити на православя, священиків, котры не были согласны, брали до лаґрів.
Пару фактів мож бы было Майнекови припомянути. В інтервю бісїдує і о тім, же днесь ся вже многы Русины чують быти Українцями. Но не вкаже на то, же то якраз повязано із тов націоналістічнов політіков, котру сам споминать, не вказує на то, же Русинам не суть доднесь признаваны їх права, же продовжує процес насилного однароднёваня Русинів, і же, і то є найосновнїше, „тверды даны“ о тім, хто чім ся чує быти, нажаль, не маєме. Бо Русины офіціално не суть в списку народностей і остатнє, єдночасно і перше, списованя населїня на Українї быв кідь презідент Буш іщі лем зачінав свій першый функчный період. Хто тото іщі памятать?
Но і так, то, што повів, значіть велё. На єднім боцї то свідчіть о тім, же є то чоловік, котрый усвідомлює собі до якого реґіону быв післаный і занимать ся ним. На боцї другім зробив велике дїло, бо свідчіть о Русинах, і нияк із нима не є повязаный, і тяжко собі мож представлёвати, же є повязаный із Москвов.
Знам, покля опонентам не выйдуть в припадї єпіскопа Майнека арґументы із Москвов, зачнуть стару співанку о тім, як ся вшыткы Українцї колись звали Русинами і мы сьме недовчены, котры тому не розуміють. Но пак їм рекомендую спомянути собі і на єпіскоповы слова о націоналістічній політіцї, котра розвалила мірный жывот народностей в тім реґіоні. І она не пришла од Русинів, котры якраз про ню потерпіли.
В 33-ім псалмі пише ся: Прийдите, чада, послушайте мене, страху Господню научу вас. Є милым несподіванём, же покля україньскы чада прийдуть за єпіскопом Майнеком, окрем страху може їх навчіти і дашто інше.
(Статя была написана як коментарь „Вступне до контроли“ лемківского радіа lem.fm.)
Жрідло фотоґрафії: Wikipedia.
П. М.
