3. 4. 2018: Все векшый інтерес о Чертіжне

Село Чертіжне на Лабірщінї знаме як місце, де є похованый Адолф Добряньскый, котрый там мав свою курію, ці як єдно із центрів Чертіжняньско-габурьского бунту із 1935-го року, коли повстали рольници. На містнім цінтерю є поховано ряд вызначных русиньскых особностей.

 

Но тото село в рамках черезгранічного проєкту в остатнїм часї зреалізовало вецеро актівностей, котры мають дати вклад до векшого звидительнїня ёго културной, історічной і природной дїідовизны.

 

Гроб будителя в Чертіжнім є културнов памятков, єднако як і містна церьков і будова бывшой жандарьской станіцї. Якраз на тій суть памятны таблы припоминаючі Чертіжняньско-габурьскый бунт і освободжіня села.

 

„На будові Дому културы є табла присвячена жертвам ІІ. світовой войны, в селї бы мала прибыти далша памятна табла припоминаюча Добряньского,“ повів про словацьку державну пресову аґентуру TASR староста села Петро Тірчак.

 

Нову таблу, на котрій має быти і буста Добряньского, дало зробити обчаньске здружіня Колысочка – Kolíska. Здружіня выписало на тот замір в рамках юбілейного Рока Адолфа Добряньского, котрый быв выголошеный Округлым столом Русинів Совеньска у 2017-ім роцї з нагоды 200-ой річніцї народжіня будителя, публічну збірку. Вызберало ся понад 2000 евр. Таблу має зробити академічна скулпторка Ева Потфаёва-Ільковічова, дївка вызначного русиньского фізіка Діонізія Ільковіча.

 

Село в рамках проєкту реалізовало різны ставебны актівности, зробили ся новы інформачны табліцї о інтересностях реґіону, друком вышла публікація о селї. Сума вытрат на цїлый проєкт, котрый быв сполуфінанцованый із Европского фонду реґіоналного розвитку 85-ма процентами, быв 50 500 евр. 10 процент фінанцовало ся із державного бюджету, 5 процент дало Чертіжне. Іде о першый проєкт, до котрого Чертіжне ішло вєдно із ґмінов Яслиска на польскім боцї.

 

Подля старосты Тірчака є село подобным проєктам одкрыте, бо і на основі того росне інтерес о Чертіжне. Найвеце турістів, подля слов старосты, відїти в лїтї, ходять на біціґлях, на автах і піше, но і в зимі ся вкажуть на ліжах-біжках. Лем вчера село на своїм профілї на сітї Facebook інформовало, же в Чертіжнім вже ку табліцям на зачатку і кінцю Чертіжного прибыло і русиньске означіня Сільского уряду. Означіня міста або села і урядных будов на тій теріторії в языку народностной меншыны є зо закона повинне всягды там, де меншына досягля холем 20 процент жытелїв подля фактів зо списованя населїня.

 

П. М., жрідло фотоґрафії: Село Чертіжне