3. 6. 2025: В Пряшові собі припомянули 75 років од ліквідації Ґрекокатолицькой церькви

29-го мая 2025-го року, на праздник Вознесенія Господа, одбыла ся споминова стрїча при нагодї недавной 75-ой рочніцї такзаного Пряшівского собору (Акції П), котрым была зрушена Ґрекокатолицька церьков у втогдышнїй Чехословакії.

Як інформовав говорця Пряшівской архієпархії Михал Павлишиновіч, стрїчу орґанізачно приготовила Ґрекокатолицька церьков у сполупраці з Конфедераціёв політічных вязнів Словакії. Подїя почала архієрейсков літурґійов, котру в Катедралнім соборі святого Йоана Крестителя одслужыв Высокопреосвященый Йона Максим, пряшівскый архієпіскоп і митрополіта. Вєдно з ним служыли священиви Архієпархіалной курії, представителї монашества і священьской семінарії.

Участны были племянници веце як штиридесятёх ґрекокатолицькых священиків, монахів і монашок, котры прияли позваная на тоту стрїчу.

Кір Йона у своїй проповідї обернув увагу на то, же в контекстї спомину на вшыткых вірных священиків, монахів і монашок, ці лаіків, котры через свою вірность Хрістови і Церькви мусили іти до арешту, робочіх лаґрів із нелюдьскыма условіями, были депортованы до приграніча, днесь видиме, же они на властнім жывотї почули тото, што то быти свідком віры, свідком вмераня і воскресіня Хріста.

Пряшівскый архієпіскоп і митрополіта вызвав молити ся за новы покликаня ку священству, монашеству, але і за „цїлкове возроджіня віры в нашій любленій країнї“.

По літурґії были переданы участным потомкам і племянникам ґрекокатолицькых священиків, монахів і монашок памятны грамоты за свідоцтво віры і вірности Ґрекокатолицькій церькви в складных 1950-ых роках. Приговорив ся участным і Петер Сандтнер, председа Конфедерації політічных вязнів Словакії, як і племянници перзеквованых.

На кінцю за вшыткых вірных успопшых помолили ся панахіду і вєдно пішли участны на ку памятній таблї на фасадї Архієпіскопского уряду, присвяченій єпіскопам, монахам, монашкам і віруючім, якы терпіли в роках 1950 – 1989 за свою Ґрекокатолицьку церьков. Там память вірных учтили собі покладжінём вінця.

Петро МЕДВІДЬ, ЛЕМ.фм, языкова і ґрафічна управа: АРК СР.