30. 1. 2025: Словацька влада схвалила Ґуралів за народностну меншыну

Ґуралї стали на Словакії новов, вже 15-ов народностнов меншынов на Словакії. На пропозіцію председы влады Роберта Фіца о тім вырїшыла влада Словацькой републікы на выїздовім засїданю в Червенім Клашторі в середу, 29-го януара 2025-го року. Інформовала о тім аґентура TASR.

„Про Ґуралїв то сатісфакція, бо ґуральска громада населять цїлу северну Словакію, од Старой Любовнї аж по вышню Мораву,“ повів староста села Ждіар Павол Бекеш з тым, же хотять, жебы ґуральска култура всокотила ся і про далшы ґенерації.

Обернув увагу, же вдяка офіціалному узнаню за народностну меншыну будуть годны на свої актівности здобыти фінанції із державного розрахунку, і далше так розвивати свою културу. Хотїли бы наприклад фінанцовати фолклорны колектівы.

„Мы уж на Словакії сьме на списку нематеріалной културной дїдовизны, і вєдно з Поляками і Чехами (Ґуралями з тых держав, позн. ред.) хочеме ся записати до списку UNESCO,“ додав Бекеш.

При послїднїм списованю жытелїв із 2021-го року на Словакії приголосило ся ку Ґуралям, хоць на то не мали окремый стовпчік у формуларі, 5273 людей. З того лем 537 собі тоту народность дало при першім вопросі, аж 4736 у другім вопросї на народность.

Словацька републіка має одтеперь 15 офіціално узнаных народностных меншын. Дотеперь послїднёв вызнанов была вєтнамска меншына, котру узнала урядницька влада Людовіта Одора у 2023-ім роцї.

Премєр Роберт Фіцо думать, же офіціалне узнаня про Ґуралїв буде значіти много. „Выходить то наприклад з того, же ґуральска меншына стане членом Рады влады Словацькой републікы про народностны меншыны.“ Председа влады не похыбує о тім, же Ґуралї як офіціална народностна меншына будуть значнов міров давати вклад до розмаїтости Словацькой републікы.

На соціалній сітї рїшіня владного кабінету окоментовав і уповномоченый влады Словацькой републікы про народностны меншыны Акош Горонь. „Ґуралї, вітайте меджі нами!“ написав, причім додав до посту мотузок на баданя о Ґуралях, котре робив Інштітут Матєя Бела.

Петро МЕДВІДЬ, ЛЕМ.фм. Ґрафічна і языкова управа: АРКСР. Фото: FB/Múzeum ľudovej kultúry v Lendaku.